✔ 最佳答案
我恁十個有九個會黎答既都會講類似野：主動啲就得架喇，男人主動就無錯，男人在這些事上都是要擔當主動角色的，唔追女仔點會有女朋友？難道女人主動追你牙？有女人告訴我佢唔會主動的。快啲擴大社交圈子，搵到合適對象就去馬吧！
本來有啲常識我都已經重覆到厭，亦睇人撞板睇到厭。不過至少如果你肯聽同肯用腦思考，你呢個初哥會撞少好多板。
但首先，唔好信任何人同你講既野，包括我。用自己既智慧去驗證。點驗證？比如自己睇下、觀察下情場聖手係點玩弄女人於股掌中，無機會觀察都用你睇電影既經驗去聯想下。比較下現實中，用咩方法既人先成功溝到女，用咩方法既人一定衰。思考方法永遠比知識更重要。
而我所認識既現實裡面，無一個人既男女朋友係靠主動追求得來。即使有，主動追求得來的情人唔會長久。
試想像，有件豬扒主動追求你，無論佢既追求幾有誠意，你會唔會動容？相反，有位美女佢無主動追求你，但好隱晦咁暗示你同佢有得發展，你會唔會漠視？咁簡單既邏輯，已足證溝唔溝到人係視乎你本身既魅力，而唔係主唔主動。
好喇，假如有件稱唔上豬扒但又遠差於美女既女人主動追你，並且令你好感動，終於你一時心軟接納左佢喇。你覺得同佢長唔長久？無可能。你願意成世屈就於一個喺你心目中無魅力既人咩？一時感動就話會，時間一耐，你一定變心。反之，你用誠意主動追得既女，一樣會咁恁，right？
我都係要重申，你唔好信我住，自己用你既智慧去驗證下，去比較下正反雙方既理據。盡可能恁啲相反既理據去反駁我，直至每一個反駁進路都失敗，先去下判斷。我都想睇下有無人可以用所謂既主流觀點反駁到我既偏激觀點，我想睇左好耐。
一旦你用理性接納左一個結論，無論你自身處境係點，都唔好抗拒接受現實。以下問題既樓主，就係一個拒絕接受現實、接受自己係感情輸家既人，希望看官唔好學佢：
http://hk.knowledge.yahoo.com/question/question?qid=7011073101386
如果你接受左我以上既結論，我就可以講落下一個問題：點為之有魅力？點用魅力去征服異性？
以上我用豬扒借代無魅力既女人，其實只係為左方便。事實上，豬扒都可以有魅力，美女都可以無魅力。魅力同樣貌無必然關係。同年齡無必然關係。同錢無必然關係。最多有襯托上既間接關係，而對於男性，呢種襯托關係更加薄弱。
唔知你有無見過類似新聞：一大堆女人盲目崇拜一個又老又醜既男人，同佢生左好多仔，個男人話自己人格完美先可以吸引咁多女人。平時堆女人要向佢報行蹤，但個男人絕不允許佢地問自己行蹤。之所以上新聞係因為輿論懷疑班女人唔知被人用咩手段控制。
另有一單，一個中年無業漢搞大無數女人既肚，並且無力撫養，法院下令佢要絕育。
唔知你見到呢啲新聞有咩感想，但從呢啲新聞至少你可以見到實例：吸引女人既能力唔在於樣、唔在於後生、唔在於錢。（你可以從價值上主觀判斷佢地賤，但不能抹殺佢地吸引到女人呢個客觀事實。）
咁係在於咩？有好多因素，亦可濃縮成一句說話：在於你似唔似一個男人。就係咁簡單？就係咁簡單。點解係咁簡單呢？因為，正如男人需要女人一樣，女人需要既係男人，唔係需要挽袋僕、接送僕、送禮物僕、同跪喺裙底下拜追求既僕。女人需要男人，好基本既常識啩？
你要時刻記住你係男人。你要搞清楚既係你同身邊女人既關係係男人同女人既關係丫，還是追求者與被追求者既主僕關係？
再睇一次，你呢個問題，問得似唔似一個男人呢：「我係男，有時行商場見到人地男女拍拖一雙一對，好羨慕，可以如何找女朋友？是否要主動追女仔？但又唔知對方鐘唔鐘意？但我又不懂得、不夠膽、沒試過主動。」
如果唔似，點樣先可以問得男人一啲？
建議你先從呢個問題著手思考。問題都問唔岩，有可能求得正確答案咩？
2011-08-17 15:22:33 補充：
testing
2011-08-17 15:22:40 補充：
「有時行商場見到人地男女拍拖一雙一對，好羨慕，係時候識女友」
一個真男人會唔會咁不安於單身既現狀呢？
「我咁正，睇下揀邊個做我女友。」
咁似自戀狂多過似男人喎。有自信固然係邁向成功既一小步，但你身邊未有女人的話，何來女人供你「揀」？你要點做，身邊先有女人供你揀？
或者咁恁啦，如果男人同女人既關係唔應該係追求者同被追者既關係，咁應該係點既關係？
2011-08-19 17:47:46 補充：
「男女關係應該是各取所需的關係吧……很多時愛是基於利益的」
我唔評論岩定錯，我著重既係思考方法有無進步。
假設男女關係係基於利益既，咁我喺原答案中舉既例子（老醜、無業既男人大把女人）又點解釋呢？佢地有咩「利益」係符合到女人既需要？其他現實中眾多既無錢無樣既男人具吸引力既例子又如何呢？
再恁深一層，利益係咪包括計算？如果基於利益，會包含理性既計算，咁你認為大部份女人受到吸引係理性既結果定係非理性既結果？男人又點呢？你若受到女人吸引，會係基於利益既計算多，定係非理性既原因多？
