✔ 最佳答案
嘉欣妹妹，你講既呢條橋我地中國係4000年前已經試過晒，而且仲要一試就2000年，直至秦朝呢個制度先至正式徹底消亡。
先秦三朝，即夏、商、周既國家運作模式同樓主講既差不多。只不過你講嗰個“聯合國”就係呢三朝當中既中央政府國，呢個中央政府國負責調庭所有佢治下“天下”各諸候國之間既紛爭，而中央政府國無論國土及國力一定最大。理論上邊個小諸侯國得罪其他國家或直接得罪中央政府國，中央政府國都會出面調庭或聯同其他國直接打嗰個搞事既國家，呢個系統由大約4000年前既夏朝開至公元前700年既西周時代都大致有效。
去到東周時代，周王室既情況同樓主提到既exactly一樣。當時周王室作為中央政府國既國力大幅下降九成，變成天下間最弱小既國家之一，弱到連周王過身都無錢為佢殮葬，求其一個諸候國都可以一日滅左佢，但周王室係咁既情況下竟然可支撐多接近500年！點解﹖全因周王室係名義上既天下共主，地位與依家既聯合國完全一樣，雖然兩者武裝力量少到不值一提，但有超然既道德認受性，無論東周時各諸侯國幾強大都好，都唔敢滅周，因為只要一做就肯定比全天下圍攻，各諸侯國最多唔向周王室進貢，呢個就係頭先講點解周王無錢落葬既原因。係咁既情況下周王國想生存，唯有用自己既超然道德地位，以外交手段向各強大既諸侯國交換利益求存。
周王國無兵又無錢，可以有乜利益比人﹖當時有啲諸侯國好強大，君主想建功立業，但隨便打仗又驚比人鬧，所以就話尊周王國為王，以周王既名義替天行道攻打某國。周王室因有呢個強國保護，亦唔怕出賣呢個王室代理人既名義比強國君主，呢個就係中史書一定有教既春秋五霸既由來。邊個先至係正宗五霸常有爭論，但佢地大致分為兩類。一類以楚莊王為代表，佢話名尊重周王，其實係用王室代理人既名義去擴張領土，周王室為求自保唯有詐唔知。另一類以晉文公為代表，佢話尊重周王係真既，而且佢真係會用周王既名義去聚集各國力量對抗外敵及解決諸侯之間既紛爭。呢類真正既王室代理人可以做到自己有面之餘連帶周王都有face，係歷史上通常都被極為尊重，可惜既係除左晉文公之外，只有另外一位霸主係呢類真正既王室代理人，佢係齊桓公。
可惜既係隨著各諸侯國之間既紛爭愈來愈激烈，各國野心亦愈來愈大，佢地亦完全唔將周王放在眼內，春秋霸主既制度徹底崩潰，周王國只能做到唔亡國，但對國際事務完全無發言權，到戰國末期被最殘暴、亦強大到無人能阻既秦國消滅，跟住秦國連其他國家都全滅，統一天下。秦朝無再用上述既“天下”模式治國，改用絕對獨裁制，全中國所有人都要絕對聽命於秦始皇，之後中國接近2000年既歷史都沿用呢個模式。
呢個制度係2000年前已證實失敗，依家既聯合國完全係周王室既翻版，既無錢亦無兵，世界亦同樣有一個強大到無人能阻既美國，好彩既係美國無統一全世界既意圖，唔係大家就要打必定令全人類滅亡既第三次世界大戰。
2011-07-12 16:08:43 補充：
嘉欣妹妹，呢個世界無實力邊個會聽你支笛﹖人類幾千年既歷史已證明呢個係顛簸不破既道理，過去、現在未來都一樣。人類歷史過去及現在都有唔少無軍力作後盾既國家存在，佢地既命運與周王國完全一樣，不外乎得兩種情況，即係因為全無軍力而不問世事，甚至將自己國家既國防交比鄰近既強國負責。例如依家既歐洲小國列支敦士登(Liechtenstein)，佢既最後一個士兵係20世紀初過身後，國防就交由瑞士負責。呢個小國極端富裕，但由於全無軍力，係國際事務上完全無影響力，連海關都交由瑞士負責，而不少人都未聽過呢個國家。
2011-07-12 16:09:04 補充：
另外一個位於法國及西班牙邊境既小國安道爾(Andorra)亦一樣，國防完全由法國及西班牙負責，亦係名不見經傳既小國。
2011-07-12 16:13:23 補充：
第二個情況既小國與周王國既情況相似，有超然既道德地位，全世界口頭上非常尊重佢。但由於全無軍力，事實上無國家聽佢支笛，其實講既係梵帝岡(Vatican)。呢個世界上最小既國家係天主教廷所在，係全球數以十億計既天主教徒既精神領袖，教廷經常都就世界大事發表意見，但無國家認真依佢既意思做，完全係因為呢個小國太細，亦毫無武裝力量之故。
2011-07-12 16:19:51 補充：
其實仲有第三個情況，就係迦太基(Carthage)悲壯既亡國滅種故事。迦太基於2000多年前係北非上極為強大既國家，後來羅馬興起，兩國係一百年間共打仗三次。其中以第二次最激烈，迦太基最後徹底戰敗，但羅馬無將迦太基亡國，反而兩國簽左和約，雙方和平相處左大概50年。
2011-07-12 16:29:09 補充：
但最後羅馬又入侵迦太基。當時迦太基國內有人認為羅馬係50年前既然可以贏左場仗都簽和約，今次可唔可以唔打仗就能夠令大家和平共處﹖梗係有人要同羅馬打仗，但迦太基國內既主流意見係唔打就講和，為表誠意，迦太基竟然決定將全國解除武裝，將所有武器交比羅馬人！呢個舉動完全嚇死羅馬人，除左估唔到迦太基咁天真之外，更重要係原來迦太基軍隊既裝備精良及數量多到如果迦太基軍隊全力作戰，羅馬根本無可能贏！羅馬指揮官見到機不可失，立刻反口入侵迦太基。
2011-07-12 16:40:35 補充：
仲有少少補充，請參閱意見欄。
2011-07-12 16:40:51 補充：
迦太基人無晒武器，點抵抗﹖佢地用菜刀、鋤頭、石頭等作為武器為生存而戰，竟然咁都可以打足三年！但後來迦太基當然弱不敵強，城破後迦太基全國男女被賣為奴隸，全城被徹底摧毀，連附近既田地及漁塘都被灑上厚厚既鹽層令佢地無法再生產糧食，維時達700年既迦太基帝國就係因為末代子孫既天真而亡國。直至現代，即係現時北非突尼西亞(Tunisia)既首都突尼斯(Tunis)附近只係剩番極少既城市遺跡，而附近既土地到依家都不適合耕種，可見當年羅馬係何等極端卑鄙及狠毒。如果迦太基唔係咁天真，以後有無羅馬帝國都成問題。國與國之間既交往必須要有軍力作為後盾，否則弱國只會任由強國宰割。
