我男友同我玩心理戰，可以點對付佢好?

我同我男朋友經常為小事嘈，以前一嘈就會搞到好大件事，我同佢同一間公司做，但唔同地方返工，我通常比佢早收工，所以我有時會等佢放工，如果吵架果日，佢就唔聽我手提，我要打公司電話佢先聽，所以我試過放工o係門口等佢，佢有時問我跟住佢做咩，我會同佢講，我地都嘈左一日，我唔想再嘈，開開心心食餐飯唔好咁計較，佢就話自已無嘈，只係唔出聲，之後佢同我講佢要返屋企食飯，我本身都好多時會去佢屋企，所以我都無所謂，好多時咁樣之後第二日就會無事。

不過最近有幾次同佢嘈真係嘈得好勁，直頭係罵戰，大家都不讓對方，我話佢變左，佢話返我成日同佢嘈都用說話hurt佢，話我講說話難聽，佢話佢有時想靜下，幾日後佢就會無野，結果我應承佢我會改，但係前日我地一早就為小事嘈，大家都做得好好，到放工就無事，結果晚飯果陣，佢又無啦啦提返件事，仲串我，當時我食緊辣野，我開唔倒口答佢，佢就話我唔答佢，之後我問佢野佢都唔答，因為我講過我唔會再嘈佢，所以我無發佢脾氣，我扮無事咁，之後佢送左我返屋企，我以為第二日就會無事。

其實佢每日都會返工前，放工後都一定會打俾我，但係尋日一早佢打黎，我"喂" 佢就收線，我都扮無野，不過佢放工打俾我就好似無事咁，我又諗住無野啦，點知到今日一早又係咁，我再打過佢，電話唔通，我打佢另一個電話，佢就話果個電話無電所以斷線，但係到頭先我放工，佢用公司電話打俾我，又係我"喂"佢就收線，再打過去佢就唔聽。

我覺得佢話我唔嘈佢就會無野，但係佢根本做唔到，我只係發覺我之前嘈到拆天，又喊晒咁，佢反而仲會氹返我，叫我唔好嬲，而家我覺得佢好似想引我發嬲，然後話我發佢脾氣，到時又係我錯，佢好似玩野咁，一日唔嘈交一日都唔安樂咁。

我可以點做呢?刻意嘈到拆天等佢氹返我?還是繼續扮無事，用誠意打動佢，等佢唔好意思再咁對我?下個星期係佢生日，禮物都準備好，佢咁大男人，我話同佢慶祝生日，佢真係會咁夠瞻話唔洗，我唔理佢，佢一定又會嬲，我可以點做?同埋佢每逢大事大節，佢知我想慶祝想出街，佢一定會事先諗辦法同我嘈，如果我想出街就一定要同佢認錯，平時我會企硬，最多唔出街，但係佢生日，我一定要主動約佢壽星仔，如果佢又玩野，咁可以點做呢?

有無男仔可以答我，其實佢咁樣對自己女朋友係點解，我肯佢無第二個，唔吵架果陣，佢真可以好好，我要咩佢又買咩俾我，咁佢係咩心態呢????到底男人咁做係想表達D咩呢????