上將、中將、少將，是什麼？

Edmond兄既答案非常正確，兩者既分別係指揮部隊既大小與職級既分別，小弟只想補充幾點。

部隊司令係根據作戰需要而安排，而軍階係根據某軍人既年資及功績而定，理論上年資及功績愈高，軍階愈高，但軍階高低與指揮部隊既大小無直接對應關係，理論上你可以派一個元帥去指揮一個步兵排(platoon，通常有步兵30至50人，一般來講排長係少尉(Second Lieutenant)或中尉(Lieutenant)，而少尉係最低階軍官，中尉高一級)，但當然唔會咁做。一般來講，不同軍階指揮既部隊大小有一個不成文規定既範圍，詳細情況小弟唔想係呢度多講，請參考小弟之前關於部隊大小既解答﹕

http://hk.knowledge.yahoo.com/question/question?qid=7010072602395

Edmond兄以美軍為例，呢個可以話係最好，但亦係最差既例子。好係因為美軍內部各軍階對應指揮既部隊大小極為清晰，例如現代美軍師長幾乎一定係少將(Major General)，軍長唔係上將(General)就係中將(Lieutenant General)，海軍中大艦(航母、巡洋艦、核潛)艦長一定係上校(Colonel)等，但其他軍隊既情況唔一定係咁。以二戰德軍為例，軍團(Army)司令可以係大將(Colonel General)、上將或元帥，軍(Corp)司令可以係少將或中將。以色列仲奇怪，猶太人話佢地國家及軍隊規模細，所以軍階最高既都只係少將(Arif)。總之各國情況不同，不同軍階對應指揮既部隊大小都不同。

另外，係某啲特殊情況下，較低階軍官因指揮範圍與上級不同，令較高階者唔一定可以管埋下屬嗰瓣。最好例子係美國航母戰鬥群既司令係一位少將，佢既工作係指揮整個戰鬥群作戰，佢既指揮所通常都係隻航母上面。但隻航母本身就唔係歸呢位將軍指揮，而係由低佢一級既上校艦長全權負責，即使如棄船此等最重要決定，亦要由上校艦長下令先至算數，而其他航母上既日常運作亦由艦長作最高負責人，艦隊司令只係船上最尊貴既搭客而已。

同樣美國航母上會有一位稱為空中老闆(Air Boss)既中校或上校軍官負責管理所有航母甲板上飛機既停放事宜。呢位仁兄事實上係大權在握既真正波士，除非情況極端特殊，否則佢既決定連艦長及司令都無權干涉。

According to steventtw20:

"海軍中大艦(航母、巡洋艦、核潛)艦長一定係上校(Colonel)等"

我作出稍微既更正:

海軍上校既英文並不是Colonel, 而是Captain.

軍長、師長、旅長、團長、營長、連長、排長、班長等都是職級，即指揮的權力範圍；

而上將、中將、少將等是軍階，兩者是不同的；

以美軍為例：每個集團軍的司令官是軍長，而擔當軍長一職的軍階一定是上將級軍官；在軍之下有師，師長一般是少將級軍官；師之下是旅，旅長是准將級軍官；旅之下是團，團長是一般是上校級軍官，餘此類推。