我都好想放低.但……

如果你真係好後悔講咗個大話, 真係好想同佢復合, 你就應該即刻
搵機會同佢講清楚你講大話嘅原因, 同埋希望佢肯同番你一齊,
當然結果係點係由佢決定, 你只可以等佢嘅答覆!

但喺你搵佢之前, 我希望你首先解開自己嘅心結, 如果唔係,
就算佢肯同番你一齊, 你哋亦未必可以長久!

首先你覺得佢仲鍾意之前嗰個, 係你自己估? 點解咁樣估?
定係佢親口講俾你知? 無論係邊個答案, 呢樣嘢喺你心裡面會有條刺,
你有冇信心可以將條刺除去? 如果做得到當然最好,
如果做唔到, 不如就咁分開, 好過第日復合之後又要分多次!

其次, 佢啲朋友已經唔止一次玩你! 一時扮佢sms俾你話受你媾,
一時又叫佢飛你, 你都話你俾佢哋玩到好嬲! 但如果你同佢復合,
你將會繼續俾佢哋玩, 你可唔可以一路忍落去? 如果忍得到當然最好,
如果忍唔到, 不如就咁分開, 好過第日復合之後又要分多次!

還有, 你覺得佢同你一齊好辛苦, 咁你有冇方法令佢唔辛苦?
如果你解決唔到呢個問題, 即係佢同你復合又要繼續辛苦落去!
愛一個人係要俾到佢幸福, 你有冇信心俾到幸福佢?

最後, 雖然分析落去好似有好多問題未解決到, 但你不妨將你心裡面
嘅問題一五一十講哂俾佢聽! 可能佢都係決定同你做番普通朋友,
但亦有機會佢肯同你一齊面對所有問題! 依家已經係最壞, 試吓啦!

祝你好運