關於讀完書出黎做老師一問

本人非常欣賞樓主想成為老師既決心。不過想講啲客觀事實比樓主知，依家教育界競爭十分激烈，完成學士及再進修一個可以令你成為註冊教師既證書課程係基本條件，無是但一樣幾乎無可能入行，但當然有例外，不過亦當然係好少數。

一般人想成為教師主要有兩個途徑。一係直入港大、中大、浸大或大埔嗰間教育學院讀四年全日制教育學士，然後就可以成為註冊教師。又或者你可以先有一個學士學位，然後再到上述四間院校既是但一間補讀一張一年全日制既學位教師教育文憑(Post Graduate Diploma of Education, 簡稱PGDE)，一樣可以成為學位教師。

要注意既係港大、中大、浸大主要係培訓中學及小學老師，想做幼稚園老師一定要讀教院，但教院亦有培訓中學及小學老師。

樓主如果真係想做老師，就必須要努力完成依家既課程睇下可唔可以直入教育學士或讀完學士後再讀PGDE，最緊要係樓主要繼續努力唔好放棄。