✔ 最佳答案
碟剎係靠一對加力鉗,鉗住與車呔同步運轉嘅剎車碟表面嚟達到減速功能。鼓剎就係利用一對撐,撐住同車呔同步運轉嘅剎車鼓內側達到減速功能(當然兩者之間有迫力皮提供摩擦力同保護金屬部件啦)。
其實最早期嘅私家車,四輪都係用剎車鼓嘅。到四五十年代碟剎先流行。
機械上講,碟剎係較有效率嘅,不過唔係因為佢比較好力(事實上相同直徑計,鼓剎係會提供較大剎車力),而係剎車碟較易散熱,而剎車力係同溫度有反向關係。故此較易散熱嘅碟剎較能保持剎車效率,再者落雨時碟剎排水亦較容易。另外,碟剎原理較簡單,維修亦較容易。
由於前輪需要較大嘅剎車效率,故此前輪碟剎係首先流行嘅。尾轆用鼓剎有個設計上嘅好處,就係手掣可以融合喺尾剎車鼓內,簡化機件。當年因為巿場口味關係,業界將四輪碟剎同高性能/先進形象扯埋一齊,慢慢大家都接受四輪碟剎。
今時今日,車馬力越來越大,而鼓剎嘅表現並無太大變化(個鼓愈大愈有力,但係個剎車鼓點都唔可以大過個車轆),相反剎車碟有好多新技術,例如透氣碟,加坑,鑽窿,或者使用新物料鑄造剎車碟,不斷提高剎車效率,故此廣受歡迎。不過,直至依家,貨車及重型車輛都係用緊鼓剎,不過私家車就好少再見到(平價車或者細馬力例外)。