✔ 最佳答案
大陸既垃圾歷史評論真係害人不淺。隆美爾元帥係人類史上少見集驚人既智慧及勇氣於一身既偉大軍人，佢既冷靜、機智已經係高到有啲病態，而佢表現出來既勇氣更令我經常覺得呢個人某程度上有啲精神病，如果唔係點解一個人可以完全無視個人安危，永遠係最前線作戰，感覺上佢極端自信到覺得自己一定唔會有事﹖歷史上好似佢咁係永遠係最前線作戰又極端自信既優秀將領唔多，我唸到既只有亞歷山大、古斯塔夫及沙龍。如果連隆美爾呢個人都唔自軍事家，仲有邊個可以話係﹖
樓上既陳兄及隔離意見版既廖兄應該再多睇二戰史，尤其係多研究同隆美爾有關既戰史先好下結論。廖兄post出來呢個言論係網絡上流傳左十年有多，但從來只限於大陸上面傳播，西方主流史學家對隆美爾評價極高，唔好忘記隆美爾傳係由一位被非洲軍俘虜過既英國軍官所寫，而呢位仁兄對元帥既評價極高，大陸嗰啲垃圾評論膚淺到得啖笑。
好明顯講得出呢個理論既人對隆美爾既性格、從軍經歷、德軍出兵非洲既原因及戰略、德軍指揮系統及傳統、德軍作戰思想及德國非洲軍既戰略狀況幾近無知，先會講得出咁kai既野。講起隆美爾，極少人提到佢其實從來無做過任何最高戰略階層既指揮職，將任何德國係非洲既戰略錯誤怪到隆美爾頭上都係無知既表現。永遠要記住隆美爾只係非洲軍團司令(係最初到非洲時佢實際上只指揮一個師咁大把)，非洲戰場總司令係廢到無人有既意大利格拉齊亞尼元帥，而廢柴元帥直接向墨索里尼負責，隆美爾只係佢既手下。但廢柴元帥幾乎唔做野，係隆美爾帶德軍來之前俾英軍打到一仆一碌。希特勒係見到意大利兵敗如山倒先唸位係咁咦幫下盟友，從來都無唸過將非洲當成主要戰線之一。非洲軸心聯軍即使有德軍幫助，兵力都只係多一、兩個師咁大把，而敵人掌握左整個地中海，補給無憂，反而軸心軍補給極困難，係咁既情況下只有永遠保持戰略主動先至有得打，如果德軍一上岸就防守，以當時非洲軸心軍既情況，佢地未必捱得到1942年。而且隆美爾去非洲之前係響當當既“鬼師”，第七裝甲師既師長，佢係法國以極高既速度令法軍迅速崩潰，佢既快速作戰手法係法國徹底成功，比著你去到非洲，見到我方形勢咁惡劣，而你啱啱搵到一個打勝仗萬試萬靈既方法，你會唔會唔用﹖
德國非洲軍從Day 1開始已經處於弱勢，但竟然仍可連克班加西及托卜魯克兩個大城，更迫到英軍係掌握整個地中海既情況都要退到開羅背水一戰，你仲想點﹖另外，德軍內部非常重視人既出身，隆美爾係平民階層，由最低級既步兵做起，雖然佢後來位極人臣成為元帥，亦攞到全軍最高榮譽，但佢唔係貴族，又無係參謀本部做過，對希特勒來講，隆美爾永遠都只係一個係前線帶兵既小頭目，佢講既野幾啱都好，都唔會影響德軍最高級指揮官既戰略決定。佢經常向希特勒及墨索里尼建議戰略及要求增緩，但兩位獨裁者從來少理，試問一個人又點可以挽救整支軍隊既命運﹖
回應樓主既問題及陳兄既言論，納粹德國就正正係搞店左生產先開戰。德國由1921年幾千億馬克先買到一個麵包既極端貧困發展至1939年開戰時既世界領先工業大國，本身已經係一個令人眼前一亮既成就。而德國係六年戰爭中，一個國家同美、蘇、英、法四大超級強國對戰，但竟然可以一個月內令地球上第二大殖民帝國及西歐第一巨強法國崩潰，又將巨大蘇聯及世界第一殖民帝國英國打到昏迷，幾乎死亡，有咁神奇既戰績你仲想點﹖雖然美國仲勁，同時對德、日兩個巨強作戰，但始終美國對住既都只係被東戰場拖到萬劫不復既德國，而唔係100%戰力既全體德軍，德軍係咁既情況下都可以將戰爭拖到1945年，實在係令人汗顏。調番轉來講，美、俄(之後係蘇聯)、英、法四大強國於50年內需要兩次聯手，用總共10年時間，並係戰後將德國民族分成三個國家(東、西德及奧地利)，並長期駐重兵防守，先至可以令德國係戰後做番乖仔，唔再搞咁多野。各位看官你覺得邊個國家勁啲﹖
2011-05-09 23:04:00 補充：
據小弟所知，隆美爾應該無參與暗殺希特勒。有書話當佢聽到係由一個獨臂人負責呢件事時，甚至破口大駡策劃者愚蠢。無記錯7月20日嗰時隆美爾係西線督戰打美軍，而且小弟亦無聽過任何與隆美爾有密切關係既軍人參與其中，所以應該唔關佢事。
2011-05-09 23:08:49 補充：
令希特勒覺得隆美爾有份主要係兩件事。第一係隆美爾經常私底下批評希特勒，亦經常當面反對希特勒及同佢對質，後者自然唔鐘意佢。另外，盛傳如果起義成功，隆美爾會即時被選為新德國既總統並代表德國與美英聯軍談判，我認為係呢樣野令希特勒要處死佢。因為隆美爾的確經常發表德國應該單獨同西方國家議和既言論，自然令希特勒好唔高興，甚至懷疑對佢不利。
2011-05-11 20:04:47 補充：
請到意見欄睇有關補充。
2011-05-11 20:08:49 補充：
古斯塔夫係呢位偉大瑞典君王既名字。佢全名係“Gustavus Adolphus”，Adolphus係佢個姓，理論上應稱佢為Adolphus先生。但佢同歷史上少數名人一樣，僅僅個名已經名留青史。古斯塔夫係瑞典國王，於1611至1632人在位，正式帝號係古斯塔夫二世，史稱古斯塔夫大帝。佢係瑞典史上最偉大既君主及軍人，從佢開始瑞典變成一個歐洲強權達數百年之久。亦由於佢既勵精圖治，瑞典從嗰陣時開始直至現在都係世界上其中一個最先進及最富庶既國家。
2011-05-11 20:13:12 補充：
古斯塔夫係歐洲史上最偉大既軍人之一，佢係拿破崙既其中一個偶像，而另一個係腓德烈大帝。古斯塔夫於1618至1648年間既三十年戰爭中成名，佢代表基督教聯軍同由法國及神聖羅馬帝國為首既天主教陣營對戰，而且戰無不勝，差啲就統一全歐。
2011-05-11 20:24:38 補充：
古斯塔夫唔單止指揮一流，而且佢本人極端英勇，但呢樣野亦成為佢戰死沙場既原因。1632年既魯曾會戰中(Battle of Lutzen)，古斯塔夫帶住瑞典軍與神聖羅馬帝國軍作戰，期間古斯塔夫發現佢側翼一個部隊被敵人圍攻，佢竟然親自帶少量兵馬去營救，最後寡不敵眾，先係佢既戰馬中左幾槍，然後佢本人被拋落馬，但隻腳甩不掉馬蹬，被隻馬拖住跑左一陣，跟住佢就被三個敵人發現並開槍打死，死時只有37歲。雖然古斯塔夫陣亡，但瑞典軍反而因為咁士氣大振，最終戰勝天主教聯軍。
2011-05-11 20:38:15 補充：
值得一提既係古斯塔夫係魯曾會戰中既對手華倫斯坦(Wallenstein)亦係當時既傳奇軍事天才。佢出身貧寒，但才華橫溢，唔單止係成功既商人，亦憑自己既累累軍功位極人臣，成為神聖羅馬帝國既大元帥。(“Generalissimo”，呢個軍階無正式中文譯名，但位置比Field Marshal高，做得呢個位既人已經係一國軍隊既總司令，亦做大元帥比較適合。)華倫斯坦與古斯塔夫可謂一時瑜亮，而前者雖然好似係魯曾會戰中輸左，但佢既軍隊無全滅，而且佢既軍功太高，威脅到神聖羅馬帝國皇帝，於是1634年被暗殺。
2011-05-11 20:43:57 補充：
另外，希特勒的確無唸過派隆美爾去東戰場，因為當時隆美爾已經係家喻戶曉既大英雄，希特勒唔想，亦肯定佢去到東戰場會極快陣亡，因為佢過份英勇，經常係極端最前線活動，肯定成為活躍既蘇聯狙擊兵既活靶。而且隆美爾雖貴為元帥，但佢軍階高到咁又無乜戰略指揮經驗，更無東戰場經驗，而東戰場上適合此等極高階軍人既大位又比貴族出身既一眾大將坐晒，連軍團司令都無晒位，唔通真係叫佢去指揮一個軍咁大材小用﹖
2011-05-15 16:01:56 補充：
先回應廖兄關於“隆美爾既著作”既問題。據小弟所知，隆美爾生前只寫過一本書，就係廣為人知既“步兵攻擊”，我估廖兄指既係呢本書。隆美爾無寫過自傳，佢既傳記係外國歷史學家根據佢留低既日記、文件及佢身邊親友既敍述而寫成。
小弟未睇過“步兵攻擊”，但據聞中心思想如廖兄所講極為強調進攻，只係隆美爾係書中是否只強調攻擊既重要性就不得而知。廖兄好似睇過“步兵攻擊”呢本書，唔知邊度有得賣或借﹖
2011-05-15 16:07:50 補充：
只要廖兄多睇隆美爾既指揮經歷，就知道大陸史學界認為佢只識得講進攻係極度無知既表現，希望各位朋友唔好聽呢啲劣質言論。隆美爾唔識防守﹖如果對第二次艾拉敏會戰稍有研究既朋友都知道隆美爾非常清楚英國第八軍團既實力強大，所以佢下令係整條戰線埋幾十萬個地雷，令英軍係完全無選擇既情況之下必須強行通過雷區進攻，呢件小事我係大陸作者所寫既二戰史中完全無睇過，更唔會有人講呢件事既重要性。最後英軍真係要在雷區中心夾硬開左幾條通道出來先至可以進攻，而且係靠壓倒性既空軍優勢及裝甲數量優勢先至可以越過防線。
2011-05-15 16:12:53 補充：
另外，當第二次艾拉敏會戰失敗後，隆美爾並無向英軍進攻，而係飛快撤退，英軍根本追唔到。點解隆美爾要撤退﹖因為佢好清楚以非洲軍當時既實力唔好話進攻，連防守都好困難，所以佢帶住軸心軍儘快撤退到一個較為安全既地方建立防線。最終非洲軍要撤到突尼西亞(Tunisia)先至可以建立較為堅固既馬瑞斯防線，隆美爾本來想係呢度拖延多一陣，令軸心國可以將部隊撤出非洲。隆美爾係嗰時完全無唸過要向兩面夾攻既英軍及美軍發動戰略攻勢，因為佢明知自己既實力完全唔可以咁做，佢只想部隊儘快撤走，只係德、意高層完全無睬佢，先至導致整個非洲軍團被殲。
2011-05-15 16:16:11 補充：
回應一下阿普斯兄。話隆美爾有“兵法”係一個比較牽強既講法。如上述，隆美爾只寫過“步兵攻擊”，講既亦只係點樣打好步兵戰，至於佢最拿手既機械化戰爭，佢就無留低任何理論。至於話佢既作戰思想來自克勞塞維茨就更係太神奇，我好懷疑隆美爾有無睇過呢本書。
2011-05-15 16:26:40 補充：
克勞塞維茨既“戰爭論”(On War)本身唔係中國人概念中，教人打仗既兵法。其實佢既英譯書名已經講左少少佢既性質。佢係一本探討戰爭本質既書，小弟睇過呢本書由鈕先鐘先生編輯過既簡化版，發覺裡面講既概念非常抽象，任何人想係呢本書學點樣打仗絕對係嘥時間。由於呢本書非常理論化，所以據聞佢只會成為最高等軍事大學既教科書，而呢類軍事大學只會培養最高級既指揮及參謀軍官。隆美爾出身低級步兵軍官，受既係較實務既訓練，之後佢好似無讀過最高等軍事大學，所以佢應講未睇過“戰爭論”。
2011-05-15 16:32:44 補充：
至於隆美爾既裝甲作戰思想來源就非常神奇。佢係成名之前做過既全部都係低層次既步兵指揮職。佢既經驗及理論全部都只係用來指揮最多營級步兵既戰鬥，佢對裝甲作戰係完全一無所知。點解忽然可以指揮一個裝甲師。因為佢當時係希特勒既近衛隊長。據聞希特勒好欣賞佢，問佢想做咩職位，隆美爾話想指揮一個裝甲師，於是佢就做左第七裝甲師長。
2011-05-15 16:38:46 補充：
咁佢點解突然識得指揮當時最先進既機械化戰爭﹖據佢自己係日記透露話佢完全係靠睇書同自己研究得番來既成果。佢話曾經睇多好多英國富勒將軍(J.F.C.Fuller)及古德林既機械化作戰理論，佢甚至話曾經親自拜訪古德林，睇左好多一手資料及請教左好多問題，咁佢就知道要點指揮一個裝甲師。如果佢講既係真就極為神奇，因為之後第七裝甲師縱橫天下無人能阻，隆美爾立刻變成機械化作戰大師。
