✔ 最佳答案
HELLO呀思~^^我唔係靈擺高手，只係有用靈擺作占卜，所以希望分享下經驗答到你啦～
1. 基本上無話學靈擺之前要學D咩的, 比起技巧, 反而要個人精神狀態要進入到alpha狀態，咩意思呢？其實即係成個人平靜下來，去除雜念，同埋要有信念，相信靈擺會WORK!! 靈擺其實係讀取人的潛意識同腦電波去運作，所以每個人都可以做到的。與其叫你出去學，不如你自己在家多試試還比較好，我一陣講講如何試，你試完可以講返個情況，先再落下一步。
2. 靈擺其實無話根據出生石或者咩水晶買最好，因為一來每個靈擺的氣場唔同，二來因為有唔同的切割同設計，要拎上手試試自己就唔就手。如果你已經通到靈擺呢，我建議你直接問該靈擺，願唔願意跟你走，同埋佢同你有無緣份、適唔適合你等，畢竟他日佢會成為你的好伙伴，徵詢佢同意係對佢的尊重。
另外，靈擺的材料都有幾種，主要分為水晶、木材、金屬，睇下你對邊種最Sensitive。如果係水晶，就要配合一下自己的氣場黎揀水晶靈擺，對新手來說，白晶最適合，因為感應特別容易，而且轉動幅度大。
3. 大部份NEW AGE SHOP / 賣水晶的店舖都有靈擺賣，但事實上，如果真係緊絀唔想洗錢，可以睇下屋企有無頸鍊(最好純銀)，或者戒指用繩穿起佢已經可以係一個靈擺啦！我試過茶包在手上都轉，所以如果唔想花費太大就可以考慮下搵搵本身有的飾物先試試。
或者你大概講個價，我可以因應你價錢介紹地方俾你。
4. 主要係要你同佢定立一套程式！例如大部分靈擺使用係順時針代表是 / 正面 / 男性，逆轉代表否 / 負面 / 女性。有時佢會前後或左右擺動，甚至多方位擺動，就要靠你同佢自己溝通下啦，從而訂立你地之間的共通共識。有D人甚至會畫圖表。
5. 個人認為同靈擺與及自己個人內在的溝通都很重要，但要小心，因為當你同一件物件係咁傾計，有機會有低靈想入侵，所以就算通到靈擺都要時刻警覺，如果覺得唔妥要停。
6. Aura-vision我都未識睇~ 答你唔到
7. 要睇下你個靈擺係咩造，各有不同的消磁法，即使係水晶，唔同水晶都有唔同的特性，因此消磁法都不同。如果係金屬就多數唔會浸海鹽水。最方便係買個白水晶簇，久不久放靈擺上去做淨化。
希望幫到你啦～: )
2011-04-02 14:17:22 補充：
如果係大概二百蚊內的話, 我建議你可以選擇去尖沙咀利時神婆度買, 佢地的靈擺大概一百至三百多不等，平的我記得好似一百四十幾都有。去到二百多少少的話，可以建議多一個港島區的選擇，係在東角駅內的晶之軒，呢兩間賣的水晶算係中下等價錢而且品質不錯的！
其實好多水晶舖都有，但真係要揀信得過先好買～
8. 唔駛講出來, 用心去唸就可以。當然，有些人會覺得講出口感覺易Handle D, 咁講出口亦無問題, 最緊要係your faith，因為係同心靈同Universe的溝通
2011-04-02 14:23:28 補充：
9. 金屬的話, 有時怕係合金唔可以浸太耐水 , 所以好多人都係買個白晶簇, 或者鼠尾草去煙煄
如果係水晶就要睇下係咩水晶啦，有D可以浸水(或海鹽水), 有D就就咁用鹽堆, 有D都係用鼠尾草同白晶簇, 仲有好多好多方法...
如果唔想買野, 可以買自我淨化能力比較強的白水晶或黑曜石靈擺。尤其係黑曜石靈擺可以用太陽消磁法就ＯＫ！
但因為黑曜石係能量比較強的能量石, 未必個個都適合。不過黑曜石係對應下三輪，尤以幫助海底輪 如果平日有例如腎臟、失眠、行動力不足、下身血氣不順等問題,黑曜石靈擺可能幾適合你，兼且用靈擺有時可能會受負能量壞氣場影響，黑曜石有助辟邪，係個唔錯的選擇。
2011-04-02 14:35:33 補充：
btw, 其實買海鹽浸水都係好平架咋~
2011-04-03 00:18:13 補充：
利時神婆：
尖沙咀加連威老道嘉蘭圍利時商場 1 樓 115 號舖及10 樓 1007 號舖
晶之軒無網站，我都唔太記得實際舖名同地址, 因為每次都係好自然咁行過去
但該店在銅鑼灣東角駅, 即SOGO旁邊的商場, 上兩層電梯, 果層樓得佢一間水晶店, 唔會去錯
