殯儀館堂倌的工作細節？？

殯儀館做堂倌現時香港行內約有一百名禮生（俗稱堂倌），兼職也有百名。以前行內大師傅會對客人呼呼喝喝，現在就要顧客至上。「喪事係唔開心事，所以必要抱住恭敬心去做，例如見到家屬喊，可以去慰問佢。要識得控制場面，如應安排逐個上前上香，唔好迫晒人個靈堂；做法事時，要企度全程跟足，先後程序唔好出錯，唔好齋企埋一邊睇。」在靈堂講話要保持禮貌及有中氣，你落力與否，客人是看到的。最初你當跟師傅學，冇人工，堂倌主要職責係打點靈堂內事務、引導做儀式法事，直至棺木火化為止。所以你要學不同形式喪禮，如潮州人、上海人同廣東人習俗都唔同，佛教、道教亦有分別。你亦會成日見屍體，跳樓及浸死的屍體最難看。「跳樓，屍體通常會爆開，而浸死，屍體會發脹及變黑。因為一定要陪你的客人打點客人先人的屍體，所以一定會接觸到睇到屍體。若果每逢有大佬輩出殯，三合會成員通常過千，要用旅遊巴車，一晚可能嗌過千次『家屬謝禮』，有時會提議搵一個人代表一個單位，唔係聲都沙埋！」此外，香爐亦好易插滿，一晚要上成千炷香，所以等不及香燒完，就要將香拿走。殯儀行業都有淡旺季，「每逢天氣轉變，都易有老人家及患病者去世；過年前亦屬旺季，因唔想將件喪事帶過年。」若旺季連續十幾日要開工，一日要企成十個鐘。在殯儀館工作一般可分為服務生、堂倌及做法事，服務生負責打掃，堂倌則負責打點禮堂儀式。殯儀這行業，入行一定要靠熟人，從沒對外聘請，對學歷沒要求，基本中五畢業已可入行，「服務生就由殯儀館聘請，我屬自僱人士，不隸屬任何殯儀館。」現時行內所有堂倌都由殯儀經理分配工作，你更可直接指定某一堂倌為你效勞。
堂倌可由兼職做起，當你儲夠一定名氣及客源，可成為全職。堂倌時薪約一百元，有口碑的每月可做超過二百小時工作，但要抽佣給經理，至於抽多少在雅虎知識+不便講你入行後慢慢就知。新人學師只得利是。升師傅後一般連利是等收入，每月平均收入約有二萬元。現時行內有不少堂倌會轉任殯儀經理，做得好的，收入可達五、六萬一個月。