做律師/大律師的生活會是如何?

1. 我唔會提議你做或唔做律師/大律師. 我講吓d情況, 你諗諗你想唔想入行. 先講刑事大律師. 試想吓: a. 你日日都係去果幾個地方 - 法庭、監獄、警署、自己chamber (寫字樓) - 法庭警署同監獄係全世界最悶最麻煩嘅地方, 唔係講規講矩 (法庭)就係門禁森嚴 (監獄), 再唔係就同爛仔竇差不多 (警署). 大律師係自僱人仕, 番到自己chamber就坐係房做嘢, 唔會同第二d counsel有 interaction. D 秘書 / typist 又唔會同你吹水埋堆. 一般寫字樓有嘅、同事間嘅 interaction, 你唔會有. 到你入行耐咗, 就可能有同行叫你去 FCC同其他 bar / solit 飲杯嘢social吓囉. 年資淺嘅, 註定做孤獨精…b. 你日日都係見埋同一堆人 - 法官、犯人、警察、律師(包括師爺) – 法官高高在上, 有佢鬧你你無反擊, 最多俾你做到 SC 時偶然喺佢 chamber 請你飲杯 sherry. 犯人有官司在身, 一定唔開心苦口苦面, 個個話自已好人過鄧肇堅. 你打輸佢就怨你鬧你, 你打贏佢手都唔會同你握. d律師日日見, 無哂 feel, 大家交往建立喺 $上 (你要靠佢介紹客仔). 警察 - 唉! 唔使講…c. 你嘅工作會淨係睇好多好多文件, 揾好多好多案例同法律, 寫好多好多嘢. 次次上庭跟住同一程序做同一樣嘢, 寫一樣嘅文件 (eg. Appeal bundle). 你話悶唔悶?d. 雖然話 “innocent until proven guilty”, 但人心肉做, 兩條友仔喺網上識個14歲女仔, 帶佢番屋企輪住嚟又強姦又雞姦又口交又吞精又拍片, 重迫個女仔係鏡頭前做 V手勢 “話下次玩過” (真實個案). 佢話你知個女仔係自願, 叫你幫佢打, 你做唔做得到?e. 當一個人為 $殺咗個泰國女華僑擺佢喺入境署電梯機房, 之後又殺咗個地勤擺佢喺引水道再勒索佢男友, 你幫佢上訴成功 (真實個案), 你會唔會開心?f. 無論輸贏都有錢收, 做得十年八年就可月入十零廿萬, 你話正唔正? 好彩嘅做到單上市公司詐騙案, 一打就120日, 每日收$4萬 (真實個案), 係咪好和味? 叻仔d廿年後做埋 SC, 打上訴上堂收20萬一日, 你話過唔過癮?g. 落老蘭一話自已係 bar, 大把靚女飛撲埋身, 你話爽唔爽?做刑事大律師其實係好悶、唔開心, 但好搵錢, 亦幾有社會地位嘅工作. 咁嘅工作, 你會唔會想做?
做民事大律師其實差不多. 只係少咗警署、犯人、監獄, 但多咗d財大氣粗、當你係佢隻洛威拿嘅客人. 不過, 起碼上court多過刑事大律師 (每單case拖更長, 揾更多$), 而且唔使見埋d強姦犯、殺人犯, 輸贏都只係錢. 不過要你幫個客喺陳庭驊老人痴呆、無得反駁時告佢搞d孫女, 將佢一生名譽毀於一旦嚟分佢身家 (真實個案), 又或者要你幫陳振聰攞張假遺囑搶小甜甜身家, 你做唔做得到?
做律師就唔同d. 就算唔上庭唔打官司, 入d細行 / 本地行幫人証吓婚, 搞吓破產, 做吓樓契, 商業買賣都揾到食. 再叻仔d, 入大行做上市、收購合併, 收入超豐厚 (但做到仆哂街), 個個月有糧出, 都幾過癮. 2. 做得法律就係咬文嚼字、鑽灰色地帶啦! 又唔可以話出名的律師只係為有錢人服務嘅. 年資深經驗夠先會做到 SC, 做到 SC先會出名, 出名就會收得貴 (例如: 清洪、王正宇、駱應鍳, 一個brief收$20萬). 無錢嘅人要揾法援, 法援又規定一定唔會請 SC, 咁咪做成 “出名的律師又只係為有錢人服務” 囉. 王正宇都曾義助綜援主婦上訴減刑, 駱應鍳亦有幫賣紙皮阿婆打甩食環署老屈案 (真實個案), 不過報紙唔會報道, 所以你唔知啫!3. 有理想? 去 d NGO做義務律師囉…
個人意見: 政府己通過律師 (solicitor)可以上高院或以上法庭打官司. 大律師 (barrister)呢行係夕陽行業. 10幾年後無人會做大律師, 因為而家開始讀 law嘅人都會選擇做律師而唔做大律師, 無官司打時都可以幫人証吓婚搵餐晏仔…

2011-03-01 12:34:09 補充：
註: 做大狀係自僱人仕, 有工開先有錢. 所以除非你屋企有錢、又或者你做咗幾年嘢有d資產, 否則你預咗頭幾年收入唔穩定兼唔多. 事實上, 銀行對初出道大律師嘅信用評級, 係同的士司機、van仔佬、舞小姐同小販同一個grade嘅.