經地產租左套房但有問題可以點

１月３號我係筲箕灣經地產女人ｐ租左金華街１個＄１５００唐一樓套房。一開始我就問Ｐ租套房有乜收費。
ｐ：１個月按金１個月租半個月水電按半個月佣即係一一半半。
本來我睇岩１間比左＄６００訂但ｐ聽錯日期以致業主以為我無心租所以唔租，之後ｐ帶我睇第２間，睇左ｏｋ我就問ｐ依間既價錢係點？
ｐ：依間好呀淨係比按金同租，乜野雜費都無咖，係收番你電費同５０蚊水囉。
我：係咪即係攞房果日只係需要比２個月錢３０００蚊，ｐ：係！
１月３號我同ｐ上左間套房檢查，試過水電熱水爐冷氣都無問題，係見廁所個天花係有條大水管穿插落地下，問過ｐ會唔會漏水ｐ話：唔會。
於是我就交錢＄３０００同埋簽租約，租約上面話【如果雙方終止合約需提早一個月通知並且如期退房並經檢查後無任何損壞方可退回全數按金】。同時地我發現租約上面多左公用電＄２０，我就問ｐ。ｐ話係走廊ｄ燈既電費。咁我就簽左約喇。
（一直都係ｐ同我接觸，我未見過業主亦無對話過，份租約都係ｐ係１月３號攞比我簽）
簽完ｐ就話：你爭我果ｄ佣慢慢比都未遲啦！
我：咁即係全數係幾多呀？
ｐ：３個月４５００，仲爭我９００。
我：點解４５００乜唔係３０００咩？
ｐ：１個佣嘛！
我：你之前唔係話半個月佣咩？
ｐ：緊係唔係啦，係１個月，通行都係咖啦！
我好無奈咁走左，心唸唔係見佢依度１５００仲要一樓真係即刻攞番錢走。

問題１）我覺得ｐ唔老實，明明一路話半月佣到簽左約就理直氣壯講１個月佣。我已經總共比左＄９００佣佢仲差６００。但租約上面所有銀碼都有列明唯獨佣金無寫，咁如果我而家因為間房有問題而終止租約可唔可以唔比欠ｐ既＄６００佣同埋攞番晒＄１５００按金？

我住唔夠１０日突然無電，我去拍番個ｆｕｓｅ先發現原來走廊我門口上面支光管都係歸我電錶，但明明ｐ話有＄２０公用電費，我就打去叫ｐ搵人上黎整電順便問問ｐ支光管電費同＄２０公用電問題。
ｐ：公用電咪即係樓梯果ｄ電囉！
但係ｐ無回應到計埋我電費支光管問題。

問題２）支光管係走廊既有乜理由歸我電錶？由睇樓到而家ｐ都無話過比我知支光管係計落我度。走廊有光管既燈掣，我熄過但好快就比隔離房開番，因為佢地成日都開住門係房門口出面整野。但我房門對住樓梯口所以好光唔需要支光管，我有乜辦法唔比人地開支光管徙我電費？

問題３）咁岩跳ｆｕｓｅ就發現左支光管係歸我電費啫，咁如果我住左成年都無郁過個ｆｕｓｅ咁我咪白白比多左錢一年？咁樣算唔算詐騙或者瞞騙？可唔可以告ｐ？

之後我買左電視返去因為間房有天線插口，插左天線但追唔到台，我打比ｐ問：點解追唔到台？
ｐ：係睇唔到咖，睇電視就要申請ｘ台上網先得。
我：關上網咩事我只係睇普通４台喎邊洗錢咖？
ｐ：成條金華街既唐樓都要申請先睇到電視咖你唔信可以問下隔離ｄ人。
我叫ｐ不如幫我申請完計番落租度，ｐ：一定要你自己申請因為係你係度住緊。
我唔多耐煩：你又唔早講！咁鬼麻煩咖，睇電視都要比錢，究竟你依度仲有乜野又收錢咖你一次過講晒出黎喇！
ｐ開始燥：你又唔一早問？我點知你要睇電視呀！小姐你租果千零蚊套房仲想點？你話有野壞我搵人整，你一陣又話依樣又講樣，我收得你果千零蚊佣仲幫你整咁多野都算係咁啦！
我即時火起：咁你個房有個天線插口我點知你依度要比錢睇電視啫！千零數唔係錢呀？你唔好同我提錢添你開頭同我講半月佣點知簽左約你就話１個月佣你都唔岩數啦！咁我又聯絡唔到個業主既間房有問題唔係搵你搵邊個？
ｐ發癲喇：不嬲都係地產做中間人個業主係唔會出面咖啦！你有乜野我都儘量安排，你咁多唔滿咪鬼租囉！我做咁多野你仲嫌依樣果樣你而家係咪玩野呀？你要玩我上黎你度同你玩囉！
跟住就ｃｕｔ左我線。

問題４）有無人知筲箕灣金華街唐樓係咪要上某台申請上網先睇到電視？但係普通４台無線同亞視咋喎邊度洗比錢咖？定係有人呃錢呀？如果真係呃錢有無得告佢地？去邊度告？點告？

問題５）就算係要申請，唔係應該個業主申請咖咩？有乜理由係我租套房既去申請？

最大問題黎喇！２月２２號我夜晚９點半返去見到廁所出面地下有ｄ水，我以為係出門前洗手整濕所以不以為然。平時依個鐘數我一係未返一係插緊耳筒聽歌。今日我無插耳筒就咁聽，到１０點幾我聽到廁所大水管又有ｄ慣性去水聲，但無幾耐我聽到ｄ好密既水滴聲，我就望望。
條大水管穿過天花果個位狂滴水！係一秒４～５滴。依個情況起碼維持左一個鐘！我唔知依ｄ係乜野水但滴到我放係廁所ｄ野濕晒而且係有陣好濃既類似漂白水既味！我唔敢掂ｄ水更加唔敢去廁所攪到我拿拿臨去左我朋友屋企沖涼。

問題６）依個滴水漏水既情況如果我同地產ｐ講會唔會有作用？（我已經影左相）我可唔可以要ｐ搵人黎整？如果ｄ水破壞左我既私人物品我可唔可以要求賠償？
問題７）咁既情況下我可唔可以要求唔足一個月通知就搬並且要攞番全數按金？
問題８）我絕對地覺得ｐ地產係呃我錢，因為我入住之後所發生既問題唔係我企係間房去檢查既短短時間內可以即場發現。我可唔可以告佢？去邊度告？可以去邊度尋求法律意見同埋尋求協助？

究竟我而家可以點做？