期待steventtw20兄解說有關F-22戰機

關於F-22，細節唔駛多講，睇維基就得﹕

http://zh.wikipedia.org/wiki/F-22%E7%8C%9B%E7%A6%BD%E6%88%B0%E9%AC%A5%E6%A9%9F

小弟只想講幾樣野。F-22係劃時代既超級戰機，亦係人類工業生產既極致表現。好難想像一架完全為隱身而設既戰機可以有咁修長流線既外型，機體比例幾近完美，無論機體內外都無明顯影響飛行既部份，而且F-22整個表面非常光滑，美國人既工藝水平仍然令小弟感到震驚。

F-22最難得既係兼顧隱身及機動兩大非常矛盾既要求。各位朋友應該都知道當年F-22既競爭者係諾斯諾普既F-23。唔係馬後炮，當我初見呢兩款戰機時就已經覺得F-23唔店。首先F-23個樣太怪，尤其係佢既垂直尾翼過於外張，兩個引擎既鼓包亦過於明顯，機體亦明顯較大。雖然好難講話F-23既機動力唔好，不過有咁多突出既部份，一定有影響。

F-22最重要既能力就梗係隱身，而佢係一架真正既全隱身戰機，RCS據聞只有0.0001平方米，其他半隱形戰機宣稱都只係由0.01至0.001平方米。F-22對隱身既考慮非常徹底，不僅蒙皮完全光滑，亦塗上隱身物料，一啲容易洩露熱輻射或反射雷達波既部份都做晒工夫。例如F-22雖然有兩個好大既進氣道，但進氣道係彎既，完全見唔到風扇，據聞進氣道入口附近亦塗有隱身物料。而噴咀則如B-2及F-117一樣刻意改動而大幅降低紅外輻射。

但最重要既係F-22有非常出眾既機動能力。F-22個引擎係F-119，呢兩架變態機器據聞可以令F-22以音速1.4倍巡航，即係唔開後燃器就飛到1.4倍音速，另外江湖傳聞F-22既超音速巡航可以維持接近廿分鐘。如果屬實就真係勁到無野好講，但小弟更想知既係F-22既超音速巡航係一定要谷到100%既軍用推力先至做到，定係用80%，甚至更低推力都做到﹖如果用低過軍用推力既輸出就可以超音速巡航，咁就再次證明美國科技水平的確係外星人水準。還望高人指點迷津。


F-22另一項絕技就係優異既過失速機動能力。一早有大量報導話F-22既攻角可以大至120度，即係機頭可以拉起越過天頂。另外，小弟親眼睇過片段見到呢架野可以起飛後立刻拉起機頭至90度垂直向上爬升，跟住係天空上好似懸停左，然後隨意轉動方向。甚至有傳聞話架機可以係攻角達70幾度既情況下向水平方向移動，即係一路“鍔”高個頭向前飛，如果係真咁又係外星科技。以前我見到蘇凱系列戰機可以做眼鏡蛇及大法輪等機動已經覺得好驚奇，但呢啲野係F-22面前實在比較小兒科。F-22既武功之所以咁邪門，都係因為天生異稟，有兩個F-119助陣所致。F-119推重比有9:1，全向轉動噴咀，呢樣野係全球頂尖，無論俄法及我地中國都有排追唔到。

不過F-22既技術指標雖然極高，但佢實在有不少不可隱藏既大問題。首先呢架機實在太貴，前線戰機要同敵人生死相博，竟然單價要1.2億！咁樣令F-22天生只能成為被保護既瀕臨絕種動物，實際作戰既機會未必及只有3、4千萬身價既F-16有用，情況同B-2一樣。雖然B-2的確做得野，但要勞師動眾搵幾十架戰機保護佢，重要掌握絕對制空權先用得。又或好似B-1咁折墜，過億身價都只能丟普通炸彈，而且仲要送外賣做炸彈卡車。而身價太高，令一向洗腳唔抹腳既美國都頂唔順，令F-22既數量嚴重不足，美國已無法好似過去一樣係空中領域無論係技術及數量上都領先別國十條街，咁樣對美國未來既國力有好大影響。

此外，F-22既隱身塗料據聞有嚴重問題。其實美國隱形戰機隱身塗料既問題已傳聞多年，據說呢啲塗料極度怕雨淋，有言論話B-2從來唔會係雨天出任務。雖然呢個傳言可信性未必咁高，因為滂沱大雨對任何飛機來講都唔係出任務既好時機，而且B-2有係阿拉斯加既極嚴寒環境露天停放長時間既能力，不過由於隱身塗料係新科技，而且成份複雜，未必可以永遠適應惡劣環境。而且，無論B-2定係F-22，佢地都要放係特別既機庫中，可以有資格維護佢地既基地亦好少，兩者絕無C-17或C-130既野戰機場起降能力，咁樣都會嚴重限制兩款軍機既使用。

仲有，F-22雖然係史上最徹底既隱形戰機，但由於美國軍機既隱身原理係靠反射雷達波到雷達收唔到既方向為主，所以如果敵國已有成熟既收發不同點雷達網，無論F-22或B-2，即使身負絕世武功都未必係敵境來去自如。如果此事屬實，咁對美國來講就係極大打擊，因為美國幾乎將所有空中武力既希望都投注係戰機既隱身能力上，美國為此花去絕大部份既軍事預算，而美國亦無法再攞出比隱形戰機更好既武器，所以如果佢地既隱身能力被破功，咁美國空軍就只能靠數量仍龐大既三代機群去應戰。雖然美軍三代機無論係數量及質量上都仍係全球頂尖，但美國若無法靠隱形戰機一舖定輸贏，咁佢係未來既軍事行動就必須要以較舊既戰機同別國可能差不多既戰機作戰，到時佢就未必攞到絕對制空權，亦未必可以打贏戰爭。