坐廁幾條問題 急問

1.紅色箭咀指住嗰個孔叫做咩名?有咩作用？

你呢條問題令在下覺得好慚愧，做咗呢行咁耐，我都淨係識叫嗰個孔做羅絲孔，係要嚟俾人插枚羅絲入去將坐廁收實响地下既，坐廁左右各有一個咁既羅絲孔。
其實呢個孔可能真係有個專業名詞都講唔定，不過我從來冇理會過呢個問題，所以唔識。

2.當我沖廁時，D屎水就會由個個孔到湧返出泥，點解，有咩解決辦法?

坐廁下面糞渠與坐廁廁咀或風琴咀之間或糞渠其他接駁位有鬆脫或爆裂，導致漏水，水流到地面又去唔切就會喺嗰個孔度湧返出嚟。解決辦法係要搵出漏水位置。治標的話，用風筒吹乾漏水位置，抺到乾淨乾淨好乾淨，用鋼塑土或玻璃膠修補。治本就應該搵師傅嚟搞。

3.塞廁所係唔係有兩種塞法？一.係廁所入面D渠塞左，二.係接駁廁所D渠塞左？

我相信你所講既「接駁廁所D渠塞左」係指外牆公家渠。冇錯，不過你既情況唔會係後者，因為會有污水由坐廁反湧出嚟。

4.係唔係每當塞廁所時，都可以用坊間個D通渠水嚟通？

係，不過結果如何係未知數，相信你睇報紙都睇得多，d通渠水有可能"拿"穿條渠，跟住滴落街。如果唔係天井位就有機會傷人。你而家既情況，俾你自己既通渠水"拿"到駁口位漏水一d都唔奇。


我係冒牌福爾摩斯，我而家接手辦理呢單畸屎。

你唔知箭咀指住嗰個孔有咩作用，咁即係另一邊亦都冇收羅絲，否則你會知道呢個係羅絲孔。
由於兩邊都冇用羅絲收實喺地下，成個坐廁就只靠坐廁底部既玻璃膠或者白英坭痴實，人坐上坐廁會郁到震到佢，連隨震到d喉，日子耐咗，d喉既駁口位就有機會震鬆，跟住就...嘿嘿...
坐廁分牆身去水同地去水，睇你張相似係地去水，你張相好吊人胃口，最重要既地方只係俾一半人地睇，簡直係視覺折磨加心理折磨，通常只有艷照先會咁做。
如果真係地去水，我答你第二條問題講果d就係癈話，可以不理，因為你隻手根本掂唔到條渠，佢匿埋咗係坐廁入面。地去水既去水渠係藏喺坐廁底地下，d沖廁水係直落你廁所既地台下面個去水孔。

結論﹕由於地台下面既去水渠瘀塞，接近地面既駁口位又漏水，所以d沖廁水就會湧番上嚟，湧上嚟之後d水俾你個坐廁包圍住，洩洪又洩唔切，水位上漲，結果就由兩個羅絲孔走番出嚟。

建議﹕呢單畸屎既維修技術要求，已經大大超越閣下既處理能力範圍，必須搵水喉師傅跟進，請以平常心看待飛出去既銀紙。


後記﹕
在下只係裝修判頭，唔係水喉師傅，建議閣下耐心等候水喉師傅更專業既意見。

2010-12-24 23:30:20 補充：
嘉誠兄，yan兄﹕首先多謝兩位師兄誇讚，可能我個腦諗嘢畸形d，所以寫出嚟既嘢都怪雞d。其實我由小學五級開始都已經係咁，我好怕死氣沈沈既問答，有時會情願答吓d無厘頭既問題輕鬆吓。
我認同yan兄所講，風琴喉出問題既機會好大，其實而家d人好多都用風琴喉，入便果條係風琴喉既機會都唔細。我都試過買咗一條唔配合既風琴喉，一裝上去即時漏水，要再去第二間五金鋪買過一條。
如果個坐廁成個底全部都用英坭沙坐實，咁應該都拆唔到，如果只係條罅抿咗白英坭，細細力震吓震吓拍吓拍吓個坐廁就甩到出嚟，唔使扑爛，我個水喉師傅試過好幾次都係咁拆。

再嚟總結﹕去水喉倒斜，駁口漏，或者風琴喉穿。

2010-12-24 23:57:34 補充：
嘉誠兄﹕
坐廁有沙眼或者質量差有裂痕造成漏水一d都唔奇，我試過連《美標》都因為有沙眼，裝咗上去都即時漏水要換，不過我諗咗一陣，覺得都係去水喉出問題機會比較大d。
題主，不如你試吓用塊鏡仔擺埋去坐廁尾部，反照出嚟，睇睇裝唔裝到邊度漏，不過相信要搵多支電筒照住條渠先得。

2010-12-27 11:49:41 補充：
yan兄﹕
所以我一定叫d客唔好喺大陸買坐廁，我話有乜問題就算人地肯換過新既俾你，你點攞番上去換？

Roca都喺大陸設廠，質素差咗唔奇，不過佢地既跟進服務好好，我試過幫個客裝既浴缸龍頭一年之後漏水，代理肯換不特止，仲換咗個高檔d、要成三千元既龍頭上去，原本個龍頭只係買咗千幾元。個客開心到不得了，始終品牌都係要維護形象。

最近天氣冷，坐厠尾喉爆裂漏水，屎水倒流，解決方法，更換自由咀尾喉。

首先在下實在佩服O記915兄每次嘅回答都十分詳盡.
依我所見,個馬桶係自由咀去水或地去水,最大可能係去水駁口流水,自由咀駁嘅風琴喉漏水機會較大,可能係個廁咀駁口同條喉不太配合,駁得唔好,喉老化,去水口比座廁咀高令污水回流儲在琴喉駁口慢慢漏出.........都係要拆出來先睇到,不過最大問題係個螺絲孔沒上螺絲釘,即是有可能係用英泥沙坐實個馬桶,可能拆唔到,要扑散佢換過個.

2010-12-25 23:42:16 補充：
O記兄:馬桶和水箱有沙眼(孔)或細裂縫在這幾年較常見,以大陸品牌仲要d客自己在大陸出事機會可達50%,就算大牌子如Roca,雖然沒漏水,但燒出來嘅形狀左右不對稱.可見d質量每況愈下.
風琴出事機會較大,除了上述,有d廁咀大過頭,用暴力後入左但膠圈裂左都未必知,有d個廁咀都唔係咁圓.

2010-12-25 23:44:21 補充：
大陸買

1.螺絲孔，比師傅收螺絲用。
2.3.4.唔係塞廁所，而係坐厠唔合格，換套新廁，此情此景不再你眼前再出現！

2010-12-24 17:23:21 補充：
915兄：
你之寫作材華真係獨一無二，佩服、佩服........
講番正題，照理沒可能D水向螺絲孔出，地下水完全沒有水壓，再想吓，幫吓人啦！