有些日常生活中的字我唔明

你(nei) ，係個代名詞，第二人稱。文言有儞，爾，汝。通常講嘢嘅人，稱呼自己做【我】，對住另一人講嘢，就稱呼對方做【你】。眾數來講，對象多過一個，就叫你哋，文言就叫爾等、汝等。
變化 [編輯]有啲話，個你字有分數量、性別同埋格。格即係按句意，唔同位有唔同讀法或者寫法。例如德文，「你打我」個你就寫du，叫主格。「我打你」個你，就寫dich，叫受格。「我送架車你」、「我送架車畀你」個你，寫dir，叫與格。而「你隻貓」或者「你嘅貓」個你，就寫dein，叫屬格。廣東話來講，無變化可言，所有都係加字補意思。例如【你】由單數一人，變眾數多人，只不過係加個【哋】字，叫你哋。嚴格來講，廣東話都無分格，勉強只有屬格，即係你後面加嘅，變成你嘅，好似「你嘅貓」咁。但有時可用數詞代，好似「你隻貓」。有時甚至可以唔用，例如「你老母」。眾數受格寫叫你哋嘅，好似「你哋啲功課」咁，用法完全同你一樣。反身格方面，加自己一字，叫【你自己】，通常係強調動作加諸自己或者自己嘅嘢身上，例如「你打你自己」，「你使你自己（嘅錢）」。 寫法 [編輯]【你】係【儞】嘅減筆，而【儞】係由【爾】分出來，專代表人稱。即係話，【你】即係【爾】。你字保留鼻音/n/開頭，而廣東話爾字，經年累月，失卻鼻音，讀/yi/。而文言【汝】字，古音係同【女】字一樣，廣東話變到無鼻音，讀/yu/。所以佢哋可能同源。廣東話入便，代名詞眾數，就加個哋，即係我哋、你哋、佢哋同人哋，個哋字唔會用喺其他名詞上。哋字可能係文言等字變音，文言有我等、爾等、人等。 敬稱 [編輯]有時講【你】太直接，會用一啲婉轉嘅字代替，以示尊重。例如，叫閣下、貴客。又或用職業，好似先生、醫生咁。又或親屬稱呼，好似阿爸、細佬。有時可以夾埋一齊用，好似「先生你」咁。文言嘅子，都係類似用法，甚至見於殷代。而受格上，喺對方親人加特敬稱，最常見係「令乜乜」，加個令字，以尊重對方同佢家人。好似令尊翁、令壽堂、令郎咁。其他話比較同廣東話同系嘅，好似官話、潮州話、上海話咁，多數都係唐字古文爾同汝出來。 官話 [編輯]官話單數用你，眾數叫你們。受格用的字跟後，變成你的同你們的，官話借「的」字替咗文言嘅「之」字，係種借字。你們合音叫您，亦用來做敬稱，因爲經已係眾數，文法上無您們呢個字。 英文 [編輯]英文你叫you，無分單數眾數。查實舊時有分，單數係thou，眾數係you。因爲受法文影響，用眾數叫人尊敬啲，就用you。日月推移，thou越用越少，家下幾乎唔用咁滯。英文雖然係印歐語系，但名詞簡化到無格可言，淨返代名詞重有啲格。