養班馬仙心得

我養過班馬仙,埃及仙,其他三角仙,
而家養緊七彩神仙,七彩神仙水質要求好高,比三角仙仲要難養,
希望可以幫到你啦!

設備方面你可能差小小野,如果無呢d野就要加番。

你有無裝(水妖精),係黑色海綿用個氣泵打氣既,
呢樣野可以制造出良好硝化細菌,養仙必備,
旺角金鱼街(卡奇水族)有得賣,十幾蚊有一個。

你缸底有無鋪沙底或者泥底,如果有要加番(底喉)同埋(潛水泵)先至鋪沙上面,
因為養鱼時間耐左缸底會產生細菌,無加呢兩樣野d鱼遲早實死,
如果清缸底就唔洗加呢兩樣野,
旺角金鱼街(升輝水族)有得賣,(底喉)$38,(潛水泵)幾十蚊有一個。

而家天氣凍左,養神仙d水温要保持26度至27度,唔係好易冷病d鱼,
一定要加番暖管,天氣得番十幾度果陣時,要用熱水爐換水,
用手試下d水温,凍過隻手小小就可以用,
因為换d太凍既水入缸,都有可能會整死d神仙。

温度計都一定要有的。


揀鱼方面:

最好唔好買袋鱼,因為袋鱼好難睇到條鱼狀態好唔好。

買缸鱼時要睇下條鱼要上下旗扯起,無缩旗,無d白色野痴住係旗,無爛身,
要有(追手),即係放隻手上魚缸顶成群鱼會追住你隻手,
甘代表缸鱼養定左,可以買。

如果真係要買袋鱼既話,就揀d鱼上下旗扯起,無缩旗,無d白色野痴住係旗,
無爛身,缩左旗d鱼唔好買,買左番去實死。


飼養方面:

放魚之前一定要落黃鹽,每10公升水落一匙,食飯盒果隻匙,
計算公升方法,水位計: 長?吋x闊?吋x高?吋÷62=?公升
黃鹽可在旺角金鱼街(宏和水族)買,$10一包,果度d黃鹽調較得幾好。
d三角仙如果唔落黃鹽先至放鱼,d鱼會好容易死。

落左黃鹽之後將成包魚浸入魚缸等30分鐘,然後剪袋,
袋裹面d水全部唔要撈條魚入缸就搞掂。

用黃鹽浸住養3至4日,就可以换水,一星期换2次,每次換1/3,
千其唔好换太多,因為直接换水喉水d神仙受唔住太重氯氣會死,
每次換完水要加番普通粗鹽落魚缸,換左幾多水就加番幾多比例普通粗鹽落缸,
都係10公升水落一匙,係魚塲既人教我,
任何淡水魚如果唔落鹽養會好易病,好易死,由其係神仙鱼。

每日餵一次急凍紅蟲就可以。

希望你再養班馬仙成功啦!

2010-11-06 13:51:17 補充：
1.這情況是否正常?
是正常的。因為d神仙鱼本身佢地唔係甘鍾意食魚糧。

2.當魚糧沉到落底時，我應否再餵新的魚糧嗎?因為隔了好幾個鐘佢地都唔會食返d舊糧...?
不應該再餵新的魚糧,因為佢地唔想食,食剩果d鱼糧要用鱼網撈番起,
唔係整污糟左d水野左細菌,會整死條神仙魚架!

3.魚糧是班馬仙最喜愛的食糧嗎?
不是。
班馬仙最喜愛的食糧是急凍紅蟲或者急凍豐年蝦。
正常既班馬仙餵急凍紅蟲比佢地食佢地會食到個肚漲卜卜先至啱。

2010-11-06 13:51:37 補充：
你試下轉急凍紅蟲比佢地食先啦! 情況應該會好好多。
如果佢地連急凍紅蟲都唔係好想食,表示佢地有體內寄生蟲,
去旺角金鱼街果間(一六九水族)買支H4(百必除),價錢$48,
幫佢地驅左d體內寄生蟲佢地就會好開口,條條食到個肚漲卜卜,
之後每個月最好都做一次驅體內寄生蟲呀!