5.1 喇叭 接點電腦用

<1> 打橫係中置,兩個大係前置,兩個細係後置.前置要出大音量既機會比較多,一般會用大隻啲既喇叭,後置多數只負責效果聲,工作量唔係咁大,用細啲都OK.即使有小小失真都冇咁易聽得出,但係有啲發燒友照樣會用大喇叭.其實你用細喇叭做前置一樣會有聲出,不過邏輯上有啲問題,資源錯配.<2> 用電腦出聲位經轉線插AUX IN可以,但即使播有5.1音效既DVD都只會出到兩聲道聲音.就算個個喇叭都有聲出,都只係Dolby pro logic模擬出來既環繞聲,唔係真正5.1聲道.好多時都淨係去晒中置,其他喇叭只有啲古古怪怪好細聲既雜音.要電腦播又真正出到5.1音效有兩個方法.1. 接光纖或者同軸線,我手頭上冇DMA-760既規格,唔知佢有冇呢啲數碼輸入,不過佢咁平,好大機會係冇.當然你電腦既音效咭都要有呢啲輸出先得.2. 靠電腦解碼,將數碼5.1音效變成6條模擬聲道,用6條同軸線接去DMA-760.當然又係要你電腦同DMA-760都支援先得.<3> 如果以上兩種方法你既設備都唔支援的話,就只可以接AUX IN的方法出聲,即係只可以出到兩聲道.其實平會5.1系統冇預你外接5.1音源的,個AUX IN只係應下急有聲出咁解.要5.1音效都係用翻佢部DVD機播碟啦. 收音機淨係得中置出聲係正常的,因為收音機話就話兩聲道,其實好多時都係單聲道.你如果用咗模擬環繞聲就會淨係中置出聲,唔用去翻正常既話就係兩個前置出聲.其他喇叭應該係冇聲既.請不會誤會加套5.1喇叭就可以將所有聲音變晒環繞聲.事實上你係要播有5.1音效既軟件例如DVD先有效果的.否則搞到有聲都係5個喇叭出同一隻聲.完全冇立體感.有啲人聽兩聲道音樂軟件都搞到全部喇叭出聲.好似好過癮好環繞咁,實質上功率分薄晒,而且後置又唔係甚麼勁喇叭,音質會差過直出前置兩聲道好多的.

2010-10-06 22:08:27 補充：
首先你部電腦既音效卡有冇光纖或者同軸等數碼輸出?冇的話你要先換咗張音效卡.
之後你需要一個有5.1解碼,可以輸入光纖或者同軸既AV擴音機.之後你駁啲喇叭去擴音機度就可以出到5.1音效喇.
不過咁做我覺得妹仔大過主人婆,買得擴音機就會駁啲好啲既喇叭,唔會駁呢啲套裝平價喇叭.建議都係用電腦駁兩聲道算數了.睇DVD都係用翻部DVD機吧.