圖片參考：http://www.hot-hit-counter.com/counter?id=1F4342BE-5E44-4477-BD08-82C1422E7682&style=d_m-tube,ml_7
《超級巨聲2》完結，但係我不滿無線對《超2》參賽者李家怡之處理手法﹗
《超1》同《超2》都有參賽者因有合約在身而退賽。（《超1》5號李寶龍Jasper，《超2》11號李家怡Rosa），但無線對此態度截然不同，Jasper可以(1)於被宣佈DSQ時出場，喊一喊，接受安慰，仲可以(2)同阿朱合唱埋先走，仲有，(3)得閒番來探下巨一參賽者，而(4)佢嘅紀錄可以保留。但Rosa被宣佈DSQ時，陳潔靈話佢損人不利己，而且(1)出場都冇，自然(2)冇得同坤哥唱完先走，(4)(我想講左4先)，佢啲tvb.com網誌、個人資料及參賽片段冇晒，tvb要將其滅口，好似當佢係從來冇參加過《超2》咁，唔當佢係前《超2》參賽者，當然(3)唔俾佢探下巨二參賽者。呢樣喺《超級巨聲2》最後一集可見到。首回合被淘汰嘅參賽者都可以喺現場欣賞，反而參賽左幾集嘅Rosa影都唔見。佢畢竟係曾經參加過《超級巨聲2》，披荊斬棘過關。另外，Jasper係第六集一開始就宣佈DSQ打響頭炮，Rosa則殿後，好似唔見得光。有人話，Rosa做唔到(1)至(3)，因為參賽伊始，佢冇友誼基礎，但佢同Jasper同樣係第六集DSQ，點解人得佢唔得﹖如果真係交情唔深，TVB更應做(4)，被其他《超2》參賽者記得佢曾經參賽過。我唔反對對《超1》Jasper客氣，但何不一視同仁對Rosa﹖佢得經理人合約，唔係唱片公司合約，唔見得對《超2》唔公平，如果咁都叫唔公平，《超2》好多參賽者都學唱歌，比賽過，全部DSQ好冇﹖所以，應當以平常心看Rosa，唔好怪佢損人不利己，佢冇損人，因為佢用自己實力爭取參賽資格，如果真係計「損人」，係評判「損人」，因為係佢地決定，況且佢地唔係好損啫，一般人interview嘅都預左會唔得。「不利己」就錯晒，你唔俾人地真心學習嘅﹖唔好話佢浪費導師心血，如果係咁，Rosa冇得同坤哥合唱，亦浪費佢精神。可能佢見經理人合約只係空頭支票，冇實際作用，所以東家唔打打西家，從另一途徑東山再起，但經理人合約取消唔到，但太心急比賽，所以冇理經理人合約。佢真係想比賽，但呢張空頭支票正正導致Rosa兩邊唔係人。Rosa係傑青，《超2》一事可會使其身敗名裂﹗我其實唔識Rosa，所以我更加要為佢講公道話。對唔認識人嘅尚且咁支持，可見TVB做法人神共憤。
更新1:
多謝大家「熱烈」既意見。 其實我想話，冇錯，我同意Rosa被取消資格，但唔一定要用咁嘅方式宣佈，可以係叫當時人自己解畫，然後可能主持人話﹕「今次唔得，下次再接再厲。」，咁落幕好似圓滿啲。 至於有人話Rosa蓄意犯規，咁我唔知，唔駛咁用陰謀論嘅。 另有人話見到Rosa喺現場，咁唔知啦，我重申，以前我唔認識Rosa。 今次爭拗在於如何定義一個人係咪《超級巨聲》參賽者。話Rosa唔係，因為佢未被淘汰前已失去參賽資格；話佢係，因為佢確實比賽過、努力過。我贊同後者之定義，比較有人情味。
