好驚男性… (男女都唔該入黎答下)

我今年16歲 我係一個好開朗同堅強既女仔 好多時候都唔會喊(識我冇4年既人都唔會見過我喊) 但我o係好早期比一個變態電話嚇過…令我對男性產生極大驚恐


事情發生經過係咁…
果個男人我唔識既
佢打黎我屋企之後我聽左啦果陣我玩緊電腦
所以都冇認真去聽電話我問佢係邊個
佢叫我估下 我求其估 話係咪我細舅父…
然後佢話係
咁我果陣聽到佢把聲唔同左
我問做咩變左聲 佢話佢感冒
咁我冇懷疑到 因為我玩緊電腦…
係勁投入果隻
之後佢同我傾計啦
都唔記得佢講咩了
突然間 佢叫我估一樣野
佢係咁形容果種物件(後尾我知係咩 係果d性玩具黎)
之後佢o係電話到自慰…我果陣真係真係冇留意…
佢淫叫 …我聽到不妙即收線果陣我收完線即刻o係到喊…真係比佢嚇到失哂神
成個呆啦
嚇死我屋企人
之後果幾日我都唔敢聽電話
見到男人我都行開好多…所以我唔鐘意比男性惦同埋同佢地講野
其實真係有好大陰影先搞到我咁:(
後尾過左1個禮拜到 個傻佬又打黎…果陣又係我接電話
我認得佢
然後佢又係叫我估佢邊個
我勁驚 即刻比我家姐聽
我家姐係咁鬧佢
勁恐佈:( 之後佢就冇打黎了


我因為呢個電話…令我到對所有男性都好不安(對爸爸冇呢個問題)
我冇拍過拖…但ok多男仔鐘意我…成日撩我
但我回應方法只會以鬧交同串既形式…
因為唔識同佢地相處
因為果個變態佬…令我判哂全部男人死判…
其實我想同d男仔一齊玩…但我做唔到
同佢地坐埋一齊會好不安(例如有5個男仔2個女仔 其中一個係我 我都會好唔舒服)
但就係因為我同佢地講野形式都好粗魯同冇禮貌…比人感覺好惡

我唔想咁樣 但好難清除果種嘔心既感覺…
我唔係同性戀 我100%肯定 但我對女仔係好好多…可以話係溫柔…
所以女仔都鐘意同我玩…
雖然係有男仔鐘意同我玩(但我真正肯同佢地一齊玩既男仔…都唔多)
而且同佢地玩我都好唔自在…

我呢排去完camp…咁岩有次我同1個男仔2個單獨留o係我房(我fd同佢個fd去左搵其他人黎打牌 所以出左去)之後我好驚…因為得我同佢 我成個人都崩緊啦…佢同我講野…我都冇哂思考能力 本來我都唔係太驚佢 但佢有d對話內容真係令我超級不安…佢:1 原來你手腳都好白淨 2 你住邊? 有冇男朋友? 有冇鐘意既人…(問好多關於呢方面既野…又無啦啦問埋我fd)果陣我真係頭腦空白哂…一句大話都冇講…有時甚至係沈默唔出聲 本來想好似平時咁好惡咁鬧佢…但我冇 唔知點解 真係好驚 雖然最後都冇事發生
但果種感覺令我好不自在…比佢咁望 我好唔鐘意…
有時有d男仔對我有好感 我知既 但本來想同佢地做朋友既心立即冇哂…變得想避開哂佢地…(如果你問我 我班d男同學點 我班冇令我心跳既男仔 所以我驚佢地 但我唔會驚佢…因為佢地對我好好)我班既男仔係有d忍受到我 而有d唔清楚我既 雖然佢地冇反感 但會以為好串果個先係真正既我…令我好難堪 因為唔想以串既形式去相處…覺得好煩

但我知 如果我再咁怕男仔…我真係可能會嫁唔出同冇人要…

點先可以冇咁驚男仔 對住佢地冇咁不安

同埋想問下男仔…如果一個女仔本來同你ok fd 但佢對你愈黎愈串(唔會係惡意咁串 會關心你)…你會唔會好憎佢?

唔該大家幫下我…