✔ 最佳答案
樓主指明要小弟回應，小弟自然要講幾句。呢類關公戰秦瓊既比較永遠都唔會有肯定既結論，若要比較，有幾樣野要矯正番先有討論既價值。
首先，鎮遠及無畏號都係早於一戰結束時已完全退役既史前戰艦，緬因級及長門級亦係過時戰艦，與當時最先進既戰艦比較完全無意思。另外，樓主必須明白劍魚式魚雷轟炸機係一架用木及布好似砌模型咁砌出黎既「轟炸機」，每次只有一枚魚雷作為武器，完全無可能夠零式打。仲有，海航既實力在於足夠數量既戰機及有高超戰技既飛行員。係二戰期間，各國無一支以海航作為打擊主力既艦隊只有一艘航母作為打擊主力，就以日魔偷襲珍珠港既艦隊為例，南雲忠一轄下既航母艦隊就有以大鳳號為主力既六艘航母，一次可出動既戰機超過二百架戰機。
如果排除交戰雙迫既航母及過時戰艦既兵力，咁比較反而有啲意思。因為剩番既戰艦都係當時交戰雙方最精銳之戰艦，只係軸心軍既實力太強。盟軍只有三艘先進戰艦，包括密蘇里號、威爾斯親王號及胡德號，但軸心軍就有五艘先進戰艦，包括大和、武藏、金剛、俾斯麥及尤金親王號，咁比較實在唔係咁公平，尤其係大和、武藏及俾斯麥更係二戰中頭三位技術指標最高既戰艦，如果真係咁打，盟國海軍幾乎必輸。
不過如果加上人員質素既比較，盟國海軍未必輸晒，雖然我一向認為德國海軍官兵質素較英國海軍高，德國海軍人員既射擊技術明顯較準確，但日魔中下級海軍人員既射擊技術及高級軍官既戰術能力極差，我根本就唔信佢地靠嗰三隻巨艦可以擊中任何盟軍戰艦，所以事實上只有俾斯麥號及尤金親王號對付三艘盟軍戰艦。
此戰關鍵如歷史一樣在於胡德號。不僅史實中胡德號被俾斯麥號擊沉(有人堅持認為令胡德號大爆炸嗰發炮彈來自尤金親王號，但只要大家留意一下兩艘德艦既主炮口徑差距就知道兩艦炮彈既威力大有分別，要將一發重炮穿入一艘四萬噸(胡德號)戰艦既深處炮彈艙並引起足以攔腰拗斷全艦既大爆炸，我相信只有俾斯麥既主炮炮彈先可以做到)，而且胡德號既裝甲確實太薄弱，若該艦咁唔好彩如史實中受到兩艘德艦一起夾攻，再加上其他日艦撞手神可能會中既炮彈，我估胡德號未必可以全身而退。另外，威爾斯親王號一出廠已經有問題，最後面裝有四支大炮既炮塔轉動有問題，就算當佢無問題，由於胡德號裝甲薄弱，面對敵人五艦齊攻，我相信盟軍最好既情況都會係三艘戰艦都受到重創而要撤出戰場。當然軸心國海軍唔會毫無損失，但該五艘戰艦最多只會有一至兩艘要退出戰場。若盟軍唔好彩，應該會有一艘戰艦(最可能係胡德號)被擊沉，其餘兩艘被重創至要回港大修，而軸心軍可能會有一艘被擊沉(可能係尤金親王號或金剛號)。總括而言，如果真係有場咁既海戰，我會覺得軸心國海軍贏，不過唔會贏得好徹底而軸心國海軍既損失亦唔會輕。
