✔ 最佳答案
回應一下施丹兄。小弟無係上述地方求生既經驗，只有一啲睇書或網頁聽過既野。
沙漠係四個地方最難搞既。如果你真係身處一個完全不知綠洲在何方既絕對乾旱沙漠中，咁真係無得搞，唔好幻想會突然見到綠洲或水源。你唯一可以做既係減少水份及體力損失。如果可以，唔好於上午10:00至下午5:00趕路，尤其絕對不可在上午11:00至下午2:00暴露於烈日下，否則數小時內將會因脫水及體溫過高而死。另外，要盡快丟掉所有唔重要既野，減少負擔，但千萬記著要減少暴露於日光下既皮膚，所以一定要著由頭包到落腳既衫，而且最好係白色以反射陽光。因無法補充水份，所以必要時要飲你本身既汗及尿以循環水份。
留係沙漠中間唔係辦法，必須搵路走，如果對星空有基本認識，搵出北極星即可定方向，沙漠夜晚極黑暗，無法行走，只能於清晨及早晨，大概係上午5:00至10:00，及於傍晚5:00至7:00趕路。沙漠中有時會有一啲肉質植物，即係仙人掌之類，如果有辦法打斷佢，入面暏喱狀既肉質可以補充少少水份，但據聞呢啲肉質極苦，好難入口，但必要時都要頂硬上。另外，沙漠可能會有啲乾河床，河床附近可能會有一小灘水可飲。
係一個無淡水既島上會好過沙漠好多。首先我個人唔信一個島完全一滴淡水都無，因為滲透作用，沙唔多唔少都會有少少過濾作用，所以一個睇落無淡水既島上，如果肯向沙灘底或地底發掘，只要掘得夠深，可能會有淡水。另外蒸餾海水亦係一個可行方法。無論你生火或用太陽熱力都好，原理大致上都係先用一個容器裝住啲海水，跟住係容器上方擺塊樹葉，水蒸氣上升時踫到樹葉後會有少部份水凝結。收集露水亦係好方法，島上一定有露水，山大斬埋有柴，肯收集一定會有可用既水。熱帶島嶼通常有椰樹，飲椰青絕對可以解渴，但據聞飲得多好容易肚瀉，一定要小心。
無淡水既山洞亦比沙漠好，同無淡水既島嶼差不多。係山洞一樣可以收集露水，而且山洞向地底掘或搵附近既暗處有無水。不過要留意山水未必可飲，以前有朋友同我講過或水最緊要係長流水，流動既水應該無問題，不過都係要小心啲，可以既飲露水算數。
小弟想強調上述所講既所有求生技能都未經本人試驗，只係小弟道聽途說既資料，只能作為大家既參考。如果想學真正既求生技能，應該搵有經驗既求生專家上堂或拜讀佢地既求生著作。
2010-07-27 00:22:40 補充：
漏左南極無講。南極唔好以為佢四週都係雪，但專家話千祈不可食雪，因為會耗用太多身體既熱量。應該用其他方法融雪黎飲。但我個人認為如果真係太口渴，食微微咁多雪實在有必要，濕下個口同潤下個面應該可以掛﹖
2010-07-27 00:27:18 補充：
關於係沙漠求生，小弟聽過以下一個故事。1991年波斯灣戰爭期間，英國特種部隊被派到伊拉克沙漠中心地帶負責摧毀飛毛腿飛彈。期間有4位隊員迷路，佢地要搵路求生。我記得後來有3個人死左，最後一位隊員竟然8日7夜無飲水無食野，最後比一個伊拉克人救番。呢個故事後來被廣泛傳頌，我記得仲拍成電影，但套戲我記得唔係幾好睇。
2010-07-27 14:57:51 補充：
回施丹兄，你講嗰個方法我聽過，但我已係正文講過，呢啲方法小弟未試過，有無用真係唔知。不過如果真係有試既可，為求生計，點都要試下。
