請分享馬爾代夫之旅的經驗

小弟舊夫去馬爾代夫旅行左6日夜。坐星航A380去，呢個係我參加呢個團既其中一個重要原因，因為我好想坐下星航，佢仲要比A380我坐，我當然要參加。

我住係離首都馬里較遠既太陽島。該島要坐內陸機去。馬爾代夫當然靚絕，我係島上住沙灘屋，間房係雙人房，我估有一千呎大，即係打開房既後門行幾步就有一個屬於自己既沙灘，無論日夜，面對住一碧海青天，係海灘上面行下或游水都係人生最高享受！如果每晚比多150美金，你可以住係淺海上既水上屋，行落樓睇就係可以潛水既淺海，不過我唔鐘意，我始終最愛一個完全屬於自己既沙灘。

馬爾代夫既水完全零污染，亦即使岸邊都係你睇相常見既碧綠色，初次見到你真係會覺得啲水靚到令呆左。由於海水零污染，各海洋生物都可以毫無困難於其中生活，佢地甚至會係海灘邊就來上岸既海水入面生活，你行落水及腰既地方，身邊就會有一群魚游來游去。

馬爾代夫既海水好自然令珊瑚可以健康成長，不過啲珊瑚顏色暗淡，雖然係好多，但唔算好靚。水上活動主要都係游水及浮潛，另外亦有夜間吊魚。馬爾代夫啲魚都幾傻，生手如我都釣到幾條，而且有好多都係於香港賣好貴既石班魚！不過當地既烹飪技巧就實在麻麻，佢地將魚肉好馬虎咁起出來，就咁煎來食，只落少少鹽，煎得太燶之餘又無味，實在極嘥。而且我覺得呢度啲海洋生物仲保持咁多數量及咁高多樣性，難得佢地對人仍全無戒心，絕對有必要限制一下隨意釣魚既活動，等呢個生物樂園可以繼續維持下去。剩番既既魚骨及魚肉會用來餵鯊魚及魔鬼魚。兩個活動都可以參與，我去左餵魔鬼魚。係夜晚9點會有一大群幾十條大大細細魔鬼魚係海灘邊等食，我地遊客既工作就係將切好既其他魚肉餵佢地，雖然污嘈啲，但都幾好玩。最過癮係當我餵緊魚時，海灘後面有一大群全身白色既蟹，傻更更咁望住我地餵魚。你行埋啲，佢地即刻好驚咁縮番入樹林，行遠啲又會成班出番來，非常可愛。餵魚之餘同班蟹玩下捉迷藏都幾得意。

若比得起錢，可以參加下群島遊。呢個trip會去啲有人住既島，參觀下佢地既設施，我去嗰個島居民好少，設施亦好簡樸，啲人亦好純良，笑容亦好優美。跟住會去一個好細既無人島玩，我去左個島既後面游水，嗰度一個人都無，天地間只有我與絕美大自然，令我樂而忘返。然後去到島中間食BBQ，不過嗰度幾多蚊，大家未必食得落。

有一樣野關於馬爾代夫係絕對無人提過，我有必要講下，就係當地既星空及海灘夜景極度優美。我係島上嗰幾日係半月，又咁啱天空無乜雲，個月亮係天空上好似探射燈咁，將地上所有野及天空照成淡淡既銀白色，海灘甚至有一層濛瀧又如夢似幻既銀暈，睇到我如癡如醉。另外馬爾代夫既星空都好靚，都睇到一啲常見既大星座，尤其係坐船出去釣魚嗰程，個天空佈滿星星，仲睇到獵戶座、天蠍座及雙子座等大星座。不過個星空唔係令我好驚奇，因為原本我估計會睇到銀河，但係應該有既地方搵左好耐都係睇唔到，令我有啲失望，我估因為島上既人工燈光及當時既半月對觀星有好大影響。但即使係咁，海灘上咁優美既景色已令我一世難忘。最有趣係根本無人對此美景有興趣，連續幾晚都只有我一個人係島上既大海灘及我房後既私人海灘享受月光及星光美景。

去馬爾代夫要注意既係當地陽光好勁，一定要搽夠太陽油先可以外出。另外當地淡水矜貴，每支1.5公升既飲用水都要幾蚊美金買，樓主要慳啲駛錢。至於駛費，如果你唔係點買野，所有駛負加埋自費活動及坐內陸機每人大概係$15,000 - $17,000左右，以一個咁正既團來講我覺得都幾合理。

網址分享:http://hk.travel.yahoo.com/destination.html?cid=2023867806

我未去過馬爾代夫，我好想去。