有關MTR?KCR?出閘會否超時問題...20PT.

1. 九龍灣→沙田最短車程：24分鐘；沙田→黃大仙最短車程：18分鐘，總和：42分鐘

2. 如果入閘後150分鐘內出閘，即使出入閘車站相鄰都唔會當作超時；如果同站出閘，超過20分鐘會收$10 (非小童 / 學生 / 長者 / 殘疾人士) / $5 (小童 / 學生)

3. 中途出閘車費自然係出發地至中途站車費 (中途站出閘時收取) + 中途站至目的地車費 (目的地出閘時收取)。來回同一車站，如果時間許可就返到出發地前一個站就較平；如果目的地唔係出發地，基本上一程過就最抵 (除咗部分來往羅湖 / 落馬洲車程)。如果唔多夠時間剩就點都係盡快出閘會好啲，因為超時罰款係最貴車程嘅收費。

4. 因路綫而異：市區綫 (紅綠藍紫)每站平均隔3 - 4分鐘 (過海長1 - 2分鐘)、馬鞍山支綫平均4分鐘、東西鐵通常隔4 - 6分鐘，不過部分隔得遠啲車站車程要6 - 8分鐘、東涌綫就5 - 10分鐘、順帶一提機場快綫除咗香港過海段5分鐘同博覽館段1 - 2分鐘外每站隔十幾分鐘、迪士尼綫車程就6分鐘

5. 九龍塘至沙田要乘搭東鐵綫往羅湖 / 落馬洲方向。無論列車終站站係邊，都會經沙田站。如果轉乘觀塘綫 / 由觀塘綫轉乘，須要先經過車站大堂，現時無須出閘即可前往另一路綫嘅大堂同月台。

2010-07-22 21:05:03 補充：
…其實宜家KCR (九廣鐵路 / 九廣東鐵)只係東鐵綫嘅前稱，隨住九鐵 / 地鐵 (即MTR)合併成為港鐵 (都係叫MTR)後都已經係港鐵嘅一部分，之所以 (以前)有分MTR、KCR係因為以前地鐵同九鐵 (東鐵)係由兩間公司各自營運。

乘搭東鐵綫 (即使係以前嘅九廣東鐵) 同乘搭任何其他港鐵鐵路路綫 (輕鐵除外)無乜分別：前往目的地所處方向嘅月台登上列車，抵達目的地時落車即可。即使搭過龍去咗羅湖 / 落馬洲，如果你並無回鄉卡 / 適合嘅旅遊證件，你無辦法出境進入內地。任何港鐵車站 (輕鐵除外)都設有客務中心 / 資訊中心處理一般客務查詢。

2010-07-22 21:07:51 補充：
《港鐵附例》同《車票發出條件》並無就20分鐘內同站出閘嘅情況列出細則，以合理邏輯推測唔會收取附加費。而「由一車站至同一車站」嘅車費無定義，所以以合理邏輯推測都唔會收取車費。換言之，以合理邏輯推測，20分鐘內同站出閘並無收費。

2010-07-22 22:38:00 補充：
超過150分鐘可被收取相等於當時最高額之單程車費作為附加費。目前最貴嘅單程車費應該係迪士尼─羅湖 / 落馬洲，成人 (學生) $51 / 特惠 $25.5