機油怎選擇

喺講 Move Turbo用咩油好前, 先借用一吓本人喺好耐之前提供嘅一個答案, 去解釋一吓偈油數字代表D咩. 10W-40, 15W-50等呢D偈油叫 Multi-Grade 偈油.

如果你係喺香港用嘅, 就先唔需要理會multi-grade偈油嘅第一個數字(5W, 10W, etc), 因為W代表Winter, 10W係代表凍車時偈油泵嘅功率可以好似泵普通非合成single-grade 10度偈油咁. 香港凍極有限. 一陣會有後話.

咁就要注意multi-grade偈油嘅第二個數字. 呢個數字係指喺攝氏一百度時偈油嘅黏度指數. 數字越大, 黏度越高, 流量越慢. 而黏度係會跟隨溫度上昇而下降. 當個比喻, 5W-40喺150C高溫時, 可能個黏度係得30, 而10W-60就跌到得50.

由此可見, 黏度越高, 就越能抵抗更高引擎工作溫度. 但喺普通或較低嘅工作溫度時, 黏度過高反而因為流速較慢, 而令引擎內部散熱功能減慢. 而且因為偈油過重, 亦增加咗偈油泵負荷, 縮短偈油泵壽命. 而且亦令到架車食油咗. 正常工作溫度情況下, 度數越高唔代表到會比到更高嘅保護. 情況有如你有五件衫, 係唔係天時暑熱都要著晒出嚟?

偈油嘅multi-grade係點嚟呢? 就係喺偈油入面加入化學聚合物. 兩個數字分別越大, 偈油入面嘅化學聚合物成份越高, 變相就係真正保護引擎嘅潤滑成份就降低.

而家講番 Move Turbo. 如果你仲有跟車嘅說明書的話, 一定會講用邊個度數. 有時喺引擎偈油蓋上面都會有寫. 如果冇時, 我認為 5W-30或者 10W-30唔會有問題. Move Turbo 輪胎直徑唔大, 行高速時可能轉數會偏高, 咁用 5W-40, 10W-40, 15W-40 嘅偈油都唔過份. 但超過40就冇需要喇.