貓仔個性最近變晒,點解佢會咁?

比較長,敬請各位耐心睇,謝謝。


我屋企隻摺耳貓仔,而家差唔多一歲,半歲前佢好乖好活潑好嗲人,鐘意人摸佢,自從屋企多左隻摺耳貓仔同埋佢開始發情之後,個性全部變晒,行路又好奇怪,吊起D腳黎行,好似著左高跟鞋咁,仲成日訓係地下,再唔係就收埋自己唔出黎,以前好8掛,而家8都唔願8..變得好孤僻..以為佢受傷,咁摸佢D腳應該會縮會痛,但佢又冇反應,佢仲會跳上跳落,不過唔靈敏,有時見佢跳果下會猶疑。


之後帶佢睇獸醫, 獸醫話佢四肢唔見受傷,不過可能因為想搵貓女,所以先會變晒。一星期後,我地就幫佢約做絕育手術。


完左手術之後既頭一個星期佢好虛弱,之後漸漸康復。過左兩個月既而家,佢依舊吊起對腳行,不過冇以前咁嚴重,而佢既性格依然孤僻,唔見好轉,不過有時見佢都鐘意追住隻新貓黎玩。我地試過用佢最鐘意既玩具引佢,佢開頭好開心願意玩,但隻新貓一加入,佢又退後,坐係度睇人玩,自己唔玩…之後我地特登唔理新貓,淨係同返佢玩,佢又好膚顯咁抓幾下,眼神不時望住新貓。


後來我開始懷疑佢自卑,以為我地錫晒新貓唔錫佢,但係我地一直以黎咩都比佢先,食野比佢先,返到屋企又叫佢個名先。之後有一日,佢訓係我張床度,我見到就走去同佢傾計摸下佢,佢開頭好開心,仲反轉個肚要我摸,之後隻新貓入左黎,佢即刻反返轉個身,起身退去第二個位坐,我刻意唔理隻新貓,又去摸返佢,但係佢就唔想比我摸咁。


仲有,佢而家唔痴人,個個摸親佢佢有時會走會縮,想抱佢更難,抱起佢佢會掙扎,你出聲叫佢唔准咁,佢會停止掙扎,但會發哀怨聲,你一鬆手,佢又趁機走。


最後,我留意佢開始反叛,佢明知我地唔比入廚房廁所,開頭佢都唔敢入,而家就成日見佢扒係廚房或廁所地下,好似有心咁,趕都唔走。


唉,好煩惱,唔知佢又咩問題…見佢變成咁好擔心佢,都唔知點先可以令佢融入返我地,我地真係冇偏心,冇話錫新貓多D,只係新貓比佢活潑比佢更加痴人,所有D人先成日同佢玩。



希望有經驗既人士可以為我解答呢個難題,萬分感謝!!