我想同佢分手

我同男友一齊已經有大半年，相識三日後便開始拍拖，最近覺得同佢愈黎愈唔夾。

我同男友都係一個有主見既人，好似去邊到食飯、幾點睇戲、甚至行左邊馬路定右邊馬路，都會各有主見。我地為咗呢d小事經常各執一詞，未至於會去到嗌交，但令我幾唔開心，覺得男友呢d小事都唔遷就我。而佢又係一個經常改變主意既人，經常三心兩意，令我好忟同無所適從，因為佢既改變打亂我的schedule。

除此之外，男友係一秒鐘都唔可以浪費，無論思想、說話定動作都好快既人，佢只對學術書本、電影同如何保持身體健康有興趣，其他事情都佢黎講都係浪費時間，而我係一個慢半拍同喜歡享受生活既人，又鐘意戶外活動同享受美酒佳餚。但男友要好快速咁完成任何一件事情，認為戶外活動甚至坐低慢慢食一餐飯都係浪費時間，所以唔肯陪我去戶外，但又要我成日陪佢睇戲，令我好失望同唔開心。我同佢講過佢唔陪我既失望，但佢都好似無動於中，我都唔想浪費口水。

雖然我都鐘意男友，但愈黎愈覺得同佢溝通唔到，可能大家年齡差距太大（十多年），一些我好緊張既事情（如事業發展），同佢講過好多次都唔上心，而一些佢好緊張既事情（如他很喜歡的健康產品），我又唔係好上心。

每一次我覺得我地溝通唔到或唔夾時，我都有諗過佢係咪一個合適我既人，佢好似好自我中心，但如果因為咁樣分手，我又覺得好似好容易放棄，始終我地對呢段感情係認真，但有時我真係覺得好似被困住咁，諗唔通。大家可以比d意見嗎？謝謝！