如何從狗外觀大概知道狗狗健康狀況?例如從牙齒看年齡?

你好!

其實我冇養過狗(我家養貓),但有少少愚見,唔知幫唔幫到你!

以下幾點都可反應到寵物身體狀況 :
a) 牙齒 / 口氣
隨可睇到年齡外,亦可睇到佢腸胃健康與否,例如蛀牙或口臭,若蛀牙會有細菌而引致口腔發炎,令寵物食慾大減,體重下降
b) 大小二便
要注意顏色,以及軟硬程度,同人一樣,太硬或太黑都唔正常!若肚痾又或便秘,可能係食左不潔食物引致腸胃炎,又或消化不良!我家老大試過有陣子每次開大,都會好淒厲咁喵,狀什辛苦,有時便便亦帶血!但見只係維持一兩日又冇事,所以冇帶佢去睇!
c) 毛色
最最最常見,尤其狗隻,正常總會甩,但唔應該多,若發現甩到好唔尋常,好可能係皮膚病,亦有機會係身體機能發出警號!
d) 其他(胃口/精神)
胃口大減,可能係鬧情緒或想你氹佢同佢玩,亦有可能係牙痛!但若胃口差之餘,對平時最中意做嘅,玩嘅,食嘅變得冇興趣,終日匿埋一面訓覺,仲要持續一陣子的話,身體應該有問題!
e) 嚴重缺水
只記得,若缺水的話,便便會發出警告訊號,變成黑色又或墨綠色,原理點解就忘了,至於仲有冇其他方面判斷到是否缺水,就唔太清楚了!
其實你可自行餵比佢飲,假設每日要飲500ml,你可用人手餵350ml,剩餘嘅就由佢自己飲,即使佢唔飲,起碼都有350ml打底,最多唔達標準,但至少唔會缺水先囉!
*******************************************************************************************
我家老大因病,兩年前已上左天堂,由發現到離開只係兩個月而已!
- 發覺佢毛色比其餘四隻暗啞,冇咁靚同滑!當時搲晒頭,我每日都同貓咪沖涼,冇理由架,有人話因沖太多而令毛質變差!
- 我家貓乾糧長期擺幾大碟出嚟供七隻貓任食,冇時間份量限制,壞處係唔知邊隻食幾多!另加兩餐濕糧,以往老大食完自己嗰份,就去食埋細佬妹食剩!唔知幾時開始,冇執尾之餘就連自己嗰份都食唔晒,之後直頭只舔晒啲汁就算,根本冇食過,以為食厭隻味(好巴閉架,食到厭悶佢地會罷食直到有新口味為止)!
- 加上爛玩嘅佢唔知幾時開始,變得好靜,由主動撩細佬妹玩並通屋走變到日日匿埋一邊訓覺,連最好感情嘅老二或我用毛毛棒撩佢,佢都冇反應,以為佢又玩厭左!
- 個樣終日顯得好攰,唔食唔郁,眼神好dup唔精靈,瘦到好恐怖(5.6kg下跌到2.4kg而已)!
此時先覺唔對路帶佢睇,原來發高燒,由於體重急劇下降,醫生建議做全身檢查,結果係絕症(FIV),仲要尾期,當時醫生話,食慾減少多數係病,再者老大啲毛已變得暗啞,係警號嚟,應一早嚟睇!
諗返轉頭,上述徵兆都出現好一陣子,但因””唔為意””呢三個字,令我自責到依家!點解咁大意?所以依家貓咪打乞嗤又或呆滯,就即打去獸醫診所約時間睇病!
*****************************************************************************************
其實唔應該單從外表去評估或衡量寵物健康與否,最多睇到大概身體內之狀況係睇唔到!有時未必一定有病徵,
例如有唔少寵物黑店專賣啲病貓b病狗b比人,買嗰陣好地地,精靈活潑,買返屋企冇耐先知有病,輕則皮膚,唔好彩嘅,上天堂亦有!
又如甩毛,我朋友因無力再養而將貓咪交回愛協,冇耐愛協話貓咪患上皮膚病而甩毛,仲以為愛協照顧不當或傳染by其他貓,後經獸醫証實因壓力同唔開心(被遺棄)而引致!
老大早已傳染比老二,前排開始出現老大病發症狀,經獸醫驗過証實瀨野,但話暫時病未發作(血液報告正常),但我已做好晒心理準備,以為佢過唔到農曆年,好彩,過到仲肥返,但上月又開始暴瘦吽哣,但依家又冇事又肥返!

****************************************************************************************
補充
眼鼻分泌
鼻
同人一樣,有鼻水即感冒,每次我話貓咪打乞嗤,獸醫都會問有冇鼻水!但我唔清楚狗嘅鼻水會否好大pat,但貓所謂鼻水,只係鼻哥會濕濕地而已

眼
可能貓咪玩時錯手抓到對方!通常會單起隻眼或狂眨,淚水會凝固為眼垢!
老四最嚴重,獸醫比支眼藥水,滴兩次即好返,之後其他貓一眨眼或有紅筋,我都會幫佢地滴!以前一年總滴3-4次,情況慢慢改善到1-2次,見有效所以配多支以不時之須!唯獨老四仍成日流眼水,唔知以為佢喊!
獸醫話,可能因眼角位太深,影響淚線(忘了點解)而比一般貓易流淚,只要眼垢唔好係綠色(發炎)就ok!


希望可幫到你啦!有問題可隨時電郵我!
[email protected]

Winnie