✔ 最佳答案
個人認為水司那的加固作用可能比光油差，因為它的滲透力及不上光油，索不到入去灰底下面，它的膜只是附在灰的表面的。
至於水司那是甚麼物料相信要等待化學專家Brian解畫了。
也想搭單請教Brian，是否因為水司那的分子微粒較大的緣故，令水司那不能像光油那樣索入灰底裏面呢？
2010-06-20 15:17:22 補充：
寫過信俾Brian，原來Brian係一個比較有性格既人，唔鐘意俾人用槍指住嚟答問題，佢話我唔明白自由既可貴喎。
A博士，你都幾古惑，發問問題先兜圈套料，咁其實都啱既，大千世界你呃我我呃你，兜圈套料冇咁易俾人搵老襯。
A博士你又真係幾懶，打個懶字都唔肯打埋豎心邊，咁其實都啱既，中國象形文字確係搵老襯，尤其是憂鬱個鬱字，發明呢個字果個人真係要拉佢去槍斃。
乳膠漆舊牆唔摌底，只油一層光油或水司拿再油乳膠漆可以嗎？相信你果句「可以嗎？」意思係問頂唔頂得住三幾年。
其實而家既情況就好似你賭馬問人某隻馬係咪sure win，冇人可以寫包單，人地只可以根據經驗或者對呢方面事物既了解話俾你聽贏面有幾高。
而家你幅牆已經有d乳膠漆好鬆，咁都仲要博就真係唔係個個都有呢股勇氣，你已經俾我睇穿咗你係一個冒險派既機會主義者。
你呢種情況油光油比水司那好，而油性司那可能比光油好，話哂佢打正旗號係oil based sealer，不過講出嚟好慚愧，作為一個裝修佬既我都只係用過一次，所以我加「可能」兩個字，呢兩個字令我覺得自己醜死怪。
A博士，你唔好當正光油係救命仙丹，佢唔係你想像中咁nice咁powerful，冇錯佢可以滲入乳膠漆入面漿住d乳膠漆，令乳膠漆硬d，光油越杰乳膠漆就越硬，越頂得住新乳膠漆既水份，唔會索飽水份之後發漲，搞到生瘡甚至裂開反起哂，不過有個矛盾就係光油杰會令到新乳膠漆食得冇咁死，而且油新乳膠漆果陣因為牆身唔索水既緣故好易流眼淚，最好用d粉質重d快乾d既乳膠漆例如駱駝牌等會比較容易油，ICI 多樂士就唔適合用喺呢種情況，除非過面。
光油同松節水既比例要因應情況執生，基於上述理由越杰越好，但係稀杰度又要乾透之後唔會起鏡面起得太犀利，都幾蝦人，因為你油果陣係未乾，一係你溝好咗松節水之後搵d窗底陣底之類細面積既地方油幾筆等一兩個鐘頭睇睇會唔會立立令，如果令到好似玻璃咁就加d松節水。
情況許可既話，光油油好咗之後等三幾日完全乾燥哂硬哂先至油乳膠漆對你有莫大既好處。
祝順利。
