點解有些地方不可以使用優惠券？

答: 這類特定市場消費群體的銷售策略, 是經過一系列步驟, 才會形成的。
1.) 市場消費群體資料搜集, 並進行有系統的分析。
2.) 分析市場環境, 進行趨勢評估。
3.) 對消費者進行分析, 同時, 了解購買者的行為。
4.) 競爭對手的強、弱項。
5.) 計算未來的市場需求。
6.) 選擇特定的市場, 進行營銷部署。
經過上述的工作, 才能擬定放在閣下眼前的“點解會咁的？ ” 的銷售策略; 這類銷售模式, 常放在價格彈性強的市場中, 可以起的作用:
1.) 增加更多的購買者。
2.) 打擊競爭對手, 提升自己的市場比率。
3.) 吸引邊緣的消費群體。
希望上述的解說, 可以幫到你。

你好!

回答者003答得好學術性啊!不過我就唔識呢啲marketing嘅專業用語,但好認同佢所講係銷售策略!我見解係

有冇留意到,其實唔只老麥架,各行各業,各式各樣之商店或食肆優惠券,後面都會有附帶條件,而且大部份都相同,嚟嚟去去都係幾點

- 此優惠券並不適用於馬場、海洋公園、機場等地方之分店
- 此優惠券並不適用於公眾假期
- 此優惠券只限用一次
- 此優惠券不能與其他優惠一齊使用

一直以嚟,我都覺得呢啲優惠券係好搵笨,好賤!諸多限制,尤其嗰啲要買指定產品或價錢先可使用!其實只要諗下,人地做生意嘅,點會唔賺你錢呢!唔斬你一頸血已偷笑,又點會咁蝕底吖!

點解間間商店都會係馬場、海洋公園、機場唔使用得呢?

(1) 有冇留意,於嗰啲地方之分店,價錢都會比市區貴?
然而我記得n年前(仍於啟德),每次送機,親戚都會於市區食飽先再入去,有次行經美心餐廳(機場),嘩!眼都突埋!喺銅鑼灣食個下午茶鷄肶餐都係十五蚊而已,但嗰道竟然要$45囉!
另外,海洋公園又係,一罐四蚊嘅可樂,竟賣到十五蚊囉!
(2) 優惠券無非都係為左吸引人去幫襯而發明嘅,但基於喺嗰啲地方嘅分店,統統都係獨市生意!咁我駛乜吸引你呢?
舉個例,假設你去海洋公園玩,當你下午一點入場啦,玩到大約四點,都會有啲肚餓或頸渴架啦!而平時喺市區,可能會嫌大家樂貴而轉去大快活,咁當然要派優惠券比你去留客啦!但若海洋公園內,就只得一間大家樂咁大把,咁你一定局住幫襯啦!唔好話冇優惠,就算七十蚊一罐汽水,你都要pay架啦!鬼叫你口喝咩!因此,好多食肆最賺錢之分店,並非旺角等呢啲旺區,而係以上幾間囉!
(3) 另外,可能你話:”車!咁我咪唔食大家樂囉!”,冇問題,可食老麥,但亦唔見平得去邊囉!同埋,基於競爭問題,多數唔會有兩間同類型嘅食肆出現!有大家樂就唔會有美心,有老麥就冇KFC…etc!總之,非幫襯不可
(4) 可能會認為,45蚊個餐,就算用券最多咪減$5,佢都有大把執啦!但若然八折優惠呢?咁就大鑊啦!加上若一間有折頭,就算唔係同款餐廳,客都會被撬走,例如其他大型連鎖店及小商戶可樂賣$20,加陣KFC賣$15,個個都幫佢買啦!若食物減價,就算唔中意食炸鷄,都會因平而屈就食一餐半餐,咁其他食店收得鋪啦!因此要減就一齊減(但冇須要)!
(5) 不過,始終有啲餐廳價錢有限,如老麥,就算比出面貴,都有限度(若冇記錯,麥記好似係同市區分店無異), anyways以上之老麥分店,條人龍多數都長到冇影!或許基於上述原因,所以即使價錢同市區一樣,亦唔可以用券吧!

依家大部份嘅地方,如disney,之所以唔比帶水,並非如佢地所講,因為怕散場後會剩餘太多垃圾,但我覺得唔係重點囉!講真,入馬場又好,大球場又好,入得去就預左成日,肚餓可以忍,但水就不能缺,然而又唔比你帶野飲,咁咪要局住入場買貴野囉!
至於有啲唔比帶樽蓋,仲賤,話就話怕馬迷球迷情緒激動掉出埸,但玻璃樽都話姐! 蓋都冇傷害性,反而飲完之膠樽仲死啦!
我諗佢係博啲人覺得冇蓋好麻煩,會一次過飲晒,最好就一支都唔好拎啦!入場買啦!講真,佢都要同租戶交代,以上地方之鋪租都幾貴下,若人人自擕,冇生意點交租?尤其小商戶,至於大型連鎖店,最賺錢嗰間都唔賺錢仲要蝕到嘔,你做埋我嗰份啦!
其實都係自己諗而已,唔敢百分百肯定,不過,真係解釋唔到點解唔比帶飲品入場囉!若我將飲料倒入真空壺係咪冇問題先!

其實世界上根本冇蛤喇,又點會隨街跳!呢啲優惠券或印花等招數,統統都係捉心理姐!

幫到你嗎?若有問題就電郵比我啦!你知我address啦!

Winnie Lee

P.S. : 唔好意思!想知道紀念冊嗰道,依家如何,OK嗎?其實所有我回答過之發問者(包括私下電郵問我嘅),我都會將之視為朋友,但怕對方未必咁諗,所以有時想問下你地解決到未都唔敢問!

因為店舖有最後決定權.

比如有的戲票優惠, 有些戲院都不接受.

這裏可以幫到你
http://actowpmo.ws5.n365dns.com/yahoo.com.hk/hk/auction/178987536