Bosch電鑽 & 鑽牆

電鑽型號pc七零八落提議既買800元果隻得啦，你又唔係日用。

在牆上鑽窿並沒有一種方法能百份百避開電線或水管，身經百戰的師傅間中亦會撞板。一般三數百元的金屬/電壓探測器並不能百分百依賴，牆內的鋼筋會影響它的準確性，係唔係都響，而且由於鋼筋入牆有一定深度，很多時響了都可以鑽。相反，探測器不響不代表無問題，因為它未必感應到一些很糼的金屬例如舊式的兩芯電話線等，量電壓又經常無反應，所以一般裝修師傅很少依賴它。而千多二千元的我本人則未用過。

其實牆身水電煤喉位置是沒法百分百估計到的，然而亦有一些方法可大大減低中招的機會。

若是鑽天花可到管理處索閱水喉；電線喉及氣體喉位置圖，但只能知大概位置，而且實際位置在建築時可能有臨時更改，圖未必有修正版，故只能作參考。

此外就只有靠自己去評估現場情況了。


先說電線﹕
若你的單位曾裝修過，而當時的電工師傅又將電線喉管打斜鋪而並非以慣常的水平或垂直方向鋪設的話，則無法估計。一般有職業道德的電工師傅如果夠價錢做的話，都不會貪快走捷徑打斜鋪的。
假設你的單位未裝修過，則有如下評估電線喉管位置方法﹕

你想像每一個開關制或插蘇，牆內都有十字形的喉管以該電制或插穌作為十字的中心點一直延伸出去(亦即假設牆內有喉管從該電制的上下左右四個方向鋪出去)。垂直的上至天花角位下至地腳線，水平的從電制兩旁打橫行直至牆角。若你無經驗的話，過了牆身轉角位仍想像它在繼續，以策安全。

這個假設的十字喉管線路沿途所經之處你就要避開不要鑽窿，如果你想安裝的物件令你避無可避，你就要知道當中某一位置會有喉管的機會率，以決定是否去博﹕
所有燈制至天花的垂直位置有喉管的機會是百份百，一鑽親就死梗，俾人搵鎗指住都唔好鑽。
所有燈制至地面的垂直位置屬高危，如果你覺得自己膽生毛你就博。
燈制左右兩旁位置相對風險較燈制上下位置低，如果未來女朋友係都要你喺燈制隔離鑽窿掛佢幅相你都可以博一鋪，記得話佢聽你為咗佢連牆入面隨時有電線都唔理。

超過八九成的電總制箱都在廚房，總制箱上下位置都要假定百份百有喉管，電制箱左右位置風險相對略低，不過只係低0,1%，呢幅牆係百鳥歸巢，個灰士箱身前身後百花開，呢幅牆背後如果係廳，你係廳鑽呢幅牆果陣就算你平時慣咗篤人背脊都要小心d。

同一道理，如果廳有一幅牆你想鑽，而它背後是廁所洗面盆的話，你亦要小心了，鑽窿之前最好先穿上雨衣。

廚房廁所裏面，外行的人最好不要鑽，對於沒有經驗的人而言風險太高，而且鑽瓷磚需要更高技術及經驗，否則隨時給你鑽爆或刮花。

此外間中有些單位的廳或走廊，牆角近天花位置會有一條水喉，要小心這出人意表的冷門位置，鑽窿之前又係最好先穿上雨衣。

一般房間內的牆身有水喉的機會微乎其微，廳牆身有水喉的機會亦算微，但如果你是全屋換過水喉而地板又不換的話，有時會有水喉由屋外水錶房經由廳牆身走去廚房廁所的。

在廳鑽窿一定要留意牆背是否廚房或廁所，如果係就要先裝香拜神。

如果你咁唔生性係都要搞廚房廁所裏面，你影幾張相e-mail俾我，我幫你評估風險，驚就兩份。

圖片參考：http://imgcld.yimg.com/8/n/HA05766299/o/701005040026013873396400.jpg

如果你不是專業使用,買把普通油壓鑽已經可以了,大概1000元以下,要知道墻內有沒有電線或喉管,可到五金店買個金鐲探測器,只係幾拾元,無需猜測冒險.祝你幸運

Bosch GBH 2-22S
Rotary Hammer

made in China 就$800

made in Germany就$1500


你可以用metal and voltage dectector去check返個solid concrete後有冇電線,氣喉,水喉.


Bosch GBH 2-22S

Concrete 22mm
wood 30mm
metal 13mm
Concrete(core bit)68mm
220V,620W
1000rpm,4400bpm

2010-05-05 22:44:04 補充：
我provide果個係油壓鑽,如果吾係常用係吾使買咁正既
可以既話,,其實你below$500可以有枝用得過既石屎鑽,
石屎鑽就一定冇油壓鑽咁好架喇,咁你自己諗下啦

咁你有冇有關經驗架，我老公係有水電煤牌嘅，我見佢用手搥吓牆就知，而且有跟住個水喉同電制同煤氣喉點行，通常都會有接駁位，例如煤氣爐，咁係厠所同廚房都有，咁即係話佢哋之門會暗喉，咁就搥吓個牆，或者跟支喉點行．
若果你係唔識，你問吓有冇朋友識嘅，多個人跟吓眼好啲囉．
電鑽我見五金舖都有得賣，喺旺角上海街有好多間賣呢種嘢，即係近住砵蘭街賣室內裝修啲嘢果條街呢，另外近旺角街市都有幾間，但係你都要問吓佢喺邊度嚟，我跟我老公去行過，有啲好平，成千零蚊就有，但我老公話係大陸嘢，火力嘛嘛．
我見我老爺同老公個FRIEND幫我裝修，我老爺用電鑽鑽牆裝廁所用品，好似鏡櫃，毛巾架，都係用一隻鑽頭，但係我老公個FRIEND用電鑽鑽纙絲上實廁所廚房天花，就用另一個鑽頭，你問清楚你要咩鑽頭喎．