東京五天行程，請提供建議

基本上你個plan都可行, 不過5月頭係日本嘅golden week (旺季), 有啲入場費可能會貴啲, 同埋去玩嗰陣會多人啲!

第一日4點先到日本 -
你冇講到係羽田定成田機場, 我估計你多數係成田(唔係再話我知啦!), 你可以搭特急Narita Express (特急成田快線JR), 經停站有池袋、新宿、東京、八王子, 車程約1小時30分, 每小時1～2班, 車費3,110日圓, 你5月2號去係日本嘅旺季, 逢旺季票價會加200日圓! 又或者搭Airport Limousine Bus(機場迎送巴士), 早上6：00至晚上23：00每小時1～6班。你可以考慮以下兩班車 -

新宿車站西口 - 停新宿車站西口約85分鐘3000日圓

新宿地區 - 停以下酒店　約85分鐘　3000日圓
HOTEL CENTURY SOUTHERN TOWER（小田急飯店世紀南塔)
HOTEL SUNROUTE TOKYO
KEIO PLAZA HOTEL（京王廣場飯店)
CENTURY HYATT TOKYO（東京世紀凱悅飯店）
SHINJUKU WASHINGTON（新宿華盛頓飯店）
PARK HYATT TOKYO（派克凱悅東京飯店）
HILTON TOKYO（希爾頓東京飯店）

去到酒店check in埋可能已經6,7點, 如果你鍾意shopping, 可以趁住百貨公司關門之前嘅少少時間去附近嘅百貨公司/shopping mall血拼! 然後去歌舞妓町行吓, 搵吓嘢食, 去遊戲機中心玩吓, 夾吓公仔... 仲未攰嘅話, 你可以去Don Quijote新宿東口店(歌舞伎町的入口處)行吓(24小時通宵營業)。

第二日想去原宿、涉谷、惠比壽，或者新宿其他地方 -
好睇你係主力要shopping嘅人, 定係純粹到此觀光, 因為所需時間可以相差好遠! 如果唔計shopping時間, 一個早上可以慢慢行完原宿一帶(竹下通, 裏原宿, 表參道), 再沿住明治通リ行埋過去澀谷(我經常都係咁樣行)! 如果搭JR過去可以慳番啲時間! 至於澀谷, 好熱鬧, 好多人, 多百貨公司, shopping mall, 食店... 剩低嗰半日可以响澀谷行, 唔夠喉shopping嘅話可能要第二日再過嚟! 如果真係有時間剩就去埋惠比壽。

第三日就想去築地、淺草、雷門、台場，不過要去轉池袋酒店，要放低d行李先 -
一早check out新宿間酒店, 然後去池袋check in (唔比你check in住就放低啲行李先), 築地(早)+淺草、雷門(午)+台場(黃昏)都可以, 但係築地一定要早去, 啲檔口開到11:00am就收, 所以如果你早上要搬酒店可能未必夠時間! 可以考慮改為淺草(早)+上野(午)+台場(黃昏), 第四日或者第五日早上先至去築地, 又或者將全日嘅行程改為第四日會好啲!

第四日想去東京丸之內果一帶，同埋其他地方 -
本人覺得(純粹個人意見)丸之內一帶似香港嘅中環, 比較high class啲, 一去無妨, 唔去都冇乜所謂~ 你可以朝早過去築地(如果前一日冇去到), 另外我會提議你去吉祥寺+井之頭公園 (响新宿轉JR中央線 - 可以feel吓一啲比較地道少少嘅日本生活), 或者代官山+惠比壽+自由之丘 (响澀谷轉東急東橫線), 夜咗可以番池袋行, 或者去六本木啲食店/夜店見識一吓!

第五日想去上野或者其他地方，之後坐6點果班機走人 -
早上先check out, 放低行李响酒店, 然後去check吓番機場嘅車, 你可以搭番Narita Express, 响池袋站有得搭, 價錢同嚟嗰陣一樣, 可以揀定搭邊班車同埋買埋飛添! 如果你間酒店唔近池袋站, 行李又唔係太多的話, check out之後可以攞埋行李去車站, 買完飛就lock起啲行李响車站啲locker, 咁就唔駛趕住番去酒店攞行李! 另外都可以搭Airport Limousine Bus, 下面班車會由池袋開出:

池袋地區 - 約85分鐘3000日圓
CROWNE PLAZA METROPOLITAN（大都會飯店）
SUNSHINE CITY PRINCE（陽光城王子飯店）

最後一日大概要2:00pm離開池袋, 朝早嘅時間可以去築地/上野/池袋消磨, 食完lunch之後就起程番香港喇!

下面呢兩個website都有好多有用嘅資料, 你可以參考一下!
http://www.welcome2japan.hk/index.html
http://www.e-japannavi.com/index.html
希望可以幫到你啦!