有了BB,下一步是...??

有驗孕證明後, 你要早D去排期, 政府同私家醫院都好爆

視乎你想在私家定政府定私家生, 如選政府生就拿驗孕証明信 &老公身分證COPY去屋企附近健康院排期, 詳情可睇呢個網址

http://www.fhs.gov.hk/tc_chi/centre_det/maternal/maternal.html

排左期會話你知幾時做產檢, 你跟番指示日子去產檢便可，有一次照超聲波會在醫院做，其他會在健康院做，
除非TOUCHWOOD個胎有D咩特別問題要去醫院做


去私家生就拿驗孕証明信去你想去生的私家醫院排期, 好似話而家為免D人霸私家同政府兩個床位, 私家醫院連香港人都要比按金, 所以你都係諗清楚去邊度生先去排期啦


當然你排左邊間醫院就去邊度做產檢, 所以你最好搵番近你屋企, 如果唔係到你大肚後期, 個肚鑼咁大都要去做產檢, 好辛苦架


另外FOR YOUR REF:


11-12週﹣ 唐氏綜合症測試--度頸皮 & 抽血

18-20週做結構性超聲波, 睇BB心, 肝, 腎, 手指, 腳指齊唔齊, &有無兔唇

28週照4D, 呢個唔係必須, 只係好奇想睇下BB, 唔做都得

呢D政府醫院無架, 私家醫院都未必有, 有都比較貴, 自己搵私家產科診所醫生做啦

首先你要決定要政府醫院定私家醫院生...

去私家生既，就睇下有冇相熟既婦產科醫生，咁就可以由第一次檢查到接生都係佢負責。記住要問清楚佢會去到邊間醫院，若果唔係你心儀既果間私家醫院，咁你就可能要搵過第二個醫生黎睇喇。又或者你直接去有婦產科既醫院排門診，咁都係一條龍係果間醫院檢查同生

去政府醫院生既，就一定要去普通診所驗孕，拎到一張證明你已懷孕既轉介信。拎住呢封信，你可以選擇去你住果區既政府醫院或者健康院登記

至於佢地既分別係，去政府醫院登記既話，可以即刻知道到你預產期果時有冇床位。有床位既話就會安排你大約12週既時候進行第一次產前檢查 (有D醫院多人D既就可能會再遲D) 至於之後要唔要到健康院做檢查，就要睇個別醫院既做法，例如QE就會係醫院檢查兩三次，正常冇咩問題就會轉去健康院做檢查。而廣華就會一直係醫院做檢查，直至生為止

先去健康院既話，你去到都一定會幫你登記。而每間健康院都會同一間政府醫院有聯繫，去果間健康院檢查，就會去番佢聯繫果間醫院生BB。不過因為健康院要預留床位既方法係儲起一疊文件咁SEND去醫院既，所以就唔會即時知道有冇床位。萬一你遲左去登記，醫院真係唔夠床位，係健康院登記既孕婦就要揀過第二間醫院喇，呢方面就會比較麻煩D

而去健康院登記既話，多數一開始都係健康院做檢查。但係都會有機會去一次醫院，因為需要照一次超聲波。冇咩問題既話，就會番去健康院檢查，直到生為止

無論去健康院或者醫院登記，都一定要帶證實已懷孕既轉介信、孕婦同丈夫既身份證明文件同住址證明。醫院基本上係辦公時間都會接受新症登記，而健康院就多數會分新症登記時間，所以最好預先CHECK清楚(可上網或致電查詢)

最後提你既係，去醫院做登記有個好處，就係醫院會有D有限額既普查，例如係廿週結構性超聲波普查，因為有限額既關係，一般去醫院登記既孕婦都可以參加得到。而去健康院登記既，可能去醫院做檢查既時候，名額已滿，咁就冇得免費做結構性超聲波檢查喇