新手想學影相, 去邊度學好?

✔ 最佳答案

入門課程我上過兩個班，兩次都平靚正。
　
我第一次係聽網友介紹去工聯會報Sam Lau既堂，三百幾上十個鐘，但去實習既話要俾多差唔多一舊水 model費及車費。Sam Sir有份正職，忘了邊間大公司度做，放工去工聯會教人，佢雖然係業餘，但玩了好多年相機，經驗非常豐富。佢人雖然老，但同成班後生仔無乜代溝，上當好鬼馬好好笑，上佢既堂完全唔悶，氣氛仲一流，放工去都唔會訓著。但衰就衰在Sam Sir 係工聯會教，若 Sam Sir 係外面攪就正囉。工聯會一季先開一次，等到頸都長晒，就算等到一班四十幾五十人迫埋一齊上堂。果一堂戶外實習堂仲誇張，八架旅遊大巴，全港所有工聯會大小分會，唔同阿Sir教既初、中、高班幾十班夾埋一齊上堂，果次成三、四百人一齊迫去影六個 model，場面就壯觀啦，但真係多人過旺角行人專用區成班龍友圍住影o靚模，真係勁無奈勁無癮。不過係可以揀唔去，因另外收費。唔講呢樣，作為入門班，齋學理論既話工聯會都叫OK，重點係平通港九，但記住一定要揀 Sam Lau 既堂，佢既堂係工聯會係最快滿。
　
另外一次係去 Digi 攪既丘子乎西藏攝影作品展時識到阿丘Sir，我見佢講得唔錯，連SONY都肯送部全篇幅勁機俾佢去西藏入沙塵，咪唸住正正經經搵番個專業既大師父學番幾招，所以又去學過。丘Sir係攪開攝影展、做開攝影評判果種，所以似藝術家多過似一個阿Sir，佢會講求攝影果種感覺，比較細緻，有深度。所以無 Sam Sir 教得咁生鬼，堂上氣氛會比Sam Sir差少少。但係丘Sir一班先收得十幾人，佢又會用一半時間講理論，一半時間做實習，我地成班同學睇完佢示範後自己跟番再試，然後用自己風格再試影，到下一堂就即刻逐個人俾相佢指導，佢果種教法好特別，我覺得咁樣實用好多，個感覺好似做了佢入室弟子咁。
　
總括來說，若果已有 DSLR 相機或有少少根底既人跟丘Sir學會正好多。若乜都唔識，連 DSLR 相機也唔知會唔會真係買既人，咁就梗係去平通全港既工聯會啦。
　

　
Sam Lau 係工聯會教既資料：(今年起加鐘加價)
http://www.hkftustsc.org/chtm/c-t2140.htm
　　
丘子乎係賽馬會創意藝術中心教：(剛轉了新地方開班)
http://photo.cueasy.com/course.html
　
　
　

新手想學影相, 去邊度學好?

回答 (2)