✔ 最佳答案
**唔能夠單憑文字網上斷症，以下意見只屬參考／分享，敬請諮詢專業醫生意見**
首先，assume係用同一個單位計算，正常T4水平係11-21，如果你164.79就唔止偏高，而係好高架喇！T4 50已經好唔舒服，成日暈下暈下，心跳手震樣樣齊，你竟然去到164先去驗？你都好捱得wor…病向淺中醫啊！
一般來說，甲狀腺素偏高有機會係甲狀腺機能亢奮Hyperthyroidism或者係甲狀腺發炎引起．確實成因不明，一般認為係壓力大所以病發．一來遺傳，二來女性發病率比男性高出好幾倍！
如果由於甲狀腺發炎，照超聲波就睇到，大概一兩個月就會好．不過無論係甲亢定甲狀腺發炎，都同樣要食年半至兩年葯，咁樣先可以醫返好同埋減低復發率．但只可以減低復發率，並唔能夠保證一定唔會復發．數字顯示有一半患者會復發；如果復發，復發時間就唔定，可能一年後，可能幾年後，亦都可能十年後．
因為甲狀腺素上升，加速新陳代謝，身體機能／心跳亦會加快．一般病徵有消瘦，心跳，手震，暈，嘔等等．脾氣暴躁都有關係，但係最近先開始定係由細到大性格係咁，就要你自己先知喇．如果長期甲亢唔理佢，仲會令到眼底脂肪組織增生，咁d組織變厚左，就會令眼球突左出黎，造成眼突．呢個就比較難搞～至於全身無力，周身骨痛，應該同甲亢無直接關係．反而甲亢會令你好似好精神，成日都好亢奮，唔想訓覺．我諗，會唔會同你工作太累，真係唔夠訓，或者你自己太緊張有關呢？
至於肥瘦既問題，係95%會瘦架wor．因為大量甲狀腺素令到新陳代謝加快，身體各種機能都會加快，食既野，吸收既calorie一下子就消化哂，所以造成消瘦．但如果你話反而肥左，會唔會係你真係食得好多好多野？譬如話：甲亢令到你新陳代謝快兩倍，但你既食量反而增加四倍，咁咪會肥囉．不過你T4咁高，又話無胃口，又唔覺得似呢個原因，除非你真係食多好多好多好多倍野啦～另外，你話你個肚好脹，呢個月肥左好多，（唔好介意）其實會唔會有機會懷孕呢？如果係，就要立刻同醫生講，因為食甲亢葯期間係唔可以懷孕，會影響胎兒！
你本身有胃氣同胃酸倒流？有無睇過醫生，照過胃鏡，確定咩情況？有無醫，醫好未？不過呢個就似乎同甲亢無直接關係
一般甲亢都用呢兩隻葯控制：Propylthiouracil (PTU) & Methimazole．但因為Methimazole 比較好，所以一般醫生都用呢隻，除非敏感或其他原因先會轉用PTU．至於你話其他調理方法，建議你請教中醫師，因為西醫方法無呢樣野．以我所以，中醫會有d寧神安睡既湯水，如果唔係葯，只係普通湯水的話，又唔怕煲下黎飲．
此外，唔知你個醫生有無提醒你，因為海鮮含有大量碘質，而碘質又增加甲狀腺素既分泌，進一步加速新陳代謝，所以對於甲亢患者就唔太適合．尤其係你T4咁高的話，最好忍下口，控制到病情之前唔好食海鮮 ．總之係海裡面生活既野都唔好食住，特別係紫菜，沙甸魚．其實除左海產，有d食物都含有少量既碘，例如：海塩，醃製類食物，菇類，洋蔥，牛奶等等．
其實最好都係你自己要放鬆下 啊～唔好咁緊張！雖然sales要跑數，好辛苦好大壓力；但每個人又何嘗唔係sales，邊有人會無壓力架呢～女人要向男人sale自己，希望得到男人既疼錫；律師要向客人sale自己揾生意，向法官sale自己既辯護係合理；醫生都要sale個病人，令佢信任自己，會再幫襯！其他每個人都係sales，只不過sale既野同方法唔同，唔好比咁大壓力，睇開d啦！
比你參考
http://zhuanti.qm120.com/neike/neifenmidaixie/jiakang/
http://www.tafm.org.tw/Data/011/426/220402.pdf
祝你早日康復！
Cheers ^_^
