gxr with a12 lens

這是Auto模式的普遍通病.
在一些光線不足的場合例如室內,快門速度會比光線充足時慢好多.容易因手震或者主體郁咗而令相片模糊.視乎情況,解決的方法有好多.例如可以用腳架穏定機身,加高iso或者加大光圈去增加快門速度,又或者用閃光燈涷結動作,甚至叫主體唔好郁等等.每一種方法都有副作用同埋要拍攝者一定技術去支援.
問題係相機設計工程師唔會知道拍攝者既技術水平.所以會用最安全既方法,即使副作用較大也顧不得那麼多.佢地會假設用得auto既人一定唔用腳架,握持相機也多數不穏.所以快門一定要快,即係會加到最大光圈,iso在相不太爛範圍下盡量高,有閃燈就開埋閃燈.佢地認為即使景深唔夠,雜訊多及閃燈引起的黑背景,光線生硬等都唔及一張模糊既相來得糟糕.
冇錯影macro係應該收光圈去增加景深,但光線唔夠就咁手持拍攝,一縮光圈張相肯定會因手震模糊,在權衡利害下當然都係開大光圈先爭取快門速度. 你可能誤會咗Auto macro佢就會幫你解決晒所有技術問題,就咁按快門就影到,事實上佢只係代表佢唔需要好似DC仔咁先轉macro模式先可以近距離對焦.
另外要理解大感光完件既景深係會俾DC仔淺好多的,DC仔就算全開光圈景深都有翻咁上下深.大感光完件就一定要縮光圈,建議你真係要在室內影macro的話就預備一支腳架.真係要手持的話就用M mode縮細光圈,加快快門,用閃光燈影吧.