青少年即場搵陌生人幫買酒 作為店員 我可以點…?[內詳]

先說明 希望大家真係幫幫我 唔滿意"未成年不能購買酒精飲品"呢條制度既人唔該唔好插我 我係想搵人幫我解決煩惱 而唔係搵人幫我增加煩惱 感謝合作!

小弟係零售店打工 前幾日有堆青少年黎買酒 果d只係好少酒精既飲品 類似係派對酒類飲品(例如類似的有Jxxx Sxxxx果種)
咁我地自己有返個良知既 都唔願意賣(某程度係自己要事後負責) 每次面對呢d事 都叫佢地出示證明先
但呢次果班人"不能出示證明"不特止 仲當場"搵d陌生人幫手買" 當中有無利益我唔知 但係 我只知我地作為店員既無辦法唔賣比佢地
重點係 有位女士仲好樂於助人~~咁話「唔緊要,我幫你買呀!」 嘩 當場呆左

事情是這樣的…
話說 果日晚上 有兩位男生(以下簡稱少年A﹑少年B)入左黎我地鋪頭買酒 佢地首先係水房拎左4支 跟住見唔夠 就叫我地店員入去拎多10支 禮貌都唔錯的 我地望佢地一眼 見到係後生仔 但基於服務為首 都拎左比佢地先
跟住放左收銀處 叫佢地出示證明 證明自己係已滿18歲的 佢地立即荒哂 係度「下?!」「咩話~」之類
跟住係度扮下野話
少年A「下?!我無帶身份證呀...你呢?」
少年B「下?!我都無喎...............咁呀...」
少年A「咁呀… 行去後面先啦,我再搵下!」
跟住丟底14支酒行左去全店最後既位置 有閉路電視 但企係收銀位既人係睇唔到佢地係度做緊乜 因為d貨架遮住哂
跟住過左陣 有位女士過黎 睇樣似4x歲 過黎話要買果14支酒 我地(店員)眼見少年A﹑B係背後跟住果位女士 又唔敢望我地 一尾望地下 都get到咩事
不過因為我地無可成立既理由拒絕到呢位女士去買酒 所以我地只好賣出去
其後 果位女士買左幾樣貨品 我多口問佢
我「岩岩買酒果幾個男仔你識嫁?佢地未夠18歲嫁喎,一次買十幾支,你都係小心d好!」(笑笑口)
女士A「下..... 我.....」
我「果然都係為印花啦」(笑笑口)
女士A「唔係,佢地係咩會嫁,我呀..........咪住,呢度幾多錢?」
我想講既係 你未買自己d野之前 手上已經拎住幾個未拆既印花… 我只能說 雖然我無資格管你 不過 希望你做好人要分輕重
咩事都好 仔係人地既 但出事時 就係你連累既…

跟住過左陣少年A又入黎 今次拖左個少年C入黎 又拎1x支酒 跟住又係收銀處比我地問證明
但係 唔同既係 咁岩 今次有位女士係度買完野找錢(當時佢只係買左2支支裝奶 未夠錢送印花) 聽到店員同少年A﹑C既對話之後
笑笑口咁話「我幫你地買!」唉 我即場o嘴 後面有位先生排隊等比錢都望一望果位女士...........
跟住買完之後 呢位女士B 手上又拎住幾個印花 我唔係想懷疑客人 但基本上唔駛諗已經知道咩事…

我想問
1. 究竟我有咩辦法拒絕呢種"好心人"幫未成年既人買酒?
2.酒精低於幾多%既酒未成年既人都可以買? (上yahoo知識睇過 有人話3% 有人話有酒精就已經唔賣得 所以我唔清楚)

最後 先感激幫助我﹑回答我既人 同埋 勸大家真係唔好咁做
佢地走法律"喇" 我地真係乜都唔做得... 話我條氣唔順又好乜都好 真係想搵人幫幫手