十個月前(09年5月尾)，我在facebook認識了我男朋友，我們一個星期看了5,6齣戲，差不多日日都見面，因為佢知道我6月中要到澳門工作一個月，十日之後我哋就一齊咗，喺澳門工作嘅一個月，每逢星期5,6佢一放工就會嚟搵我，冇得見嘅日子，我哋亦會傾三、四個鐘電話，嗰陣我覺得自己好幸福，到7月中番香港開始，我搬咗去同佢一齊住，之後開始有問題出現，佢成日好擔心我會同第二個一齊，唔比我同所有男仔出去，我哋關係開始差咗，直到11月尾，我把工作辭掉，想搵份office工，諗住可以多啲時間一齊，但今年一月尾，我哋又嗌交，佢叫我搬走，之後仲同我講要分手，二月中，我發現自己有咗BB，我同佢講我想要個小朋友，因為係第一次有而且當時冇安全措施，佢亦話我有咗可以要，但點知佢話如果我堅持要個小朋友，我可以生，但佢只會對BB負責，唔會同我一齊，除非我唔要BB佢先會同番我一齊，最後因為我自私，我想佢愛番我，三月頭，佢同我去落咗個BB，之後我先知道原來做完啲咁嘅嘢，我自己冇辦法原諒自己，我平伏唔到自己心情，每晚我都發惡夢，我每日都等天光先瞓到，但手術之後一星期唔夠，佢就係咁話要同啲朋友出去玩，去飲酒，每次出去，我都只係自己坐喺度，睇住佢玩，叫佢唔好出去，我話想佢陪我，佢就連電話都唔聽，自己失蹤，我已經面臨精神崩潰，上星期六，我朝早七點幾起身番學，十二點幾放學之後番咗佢屋企，到夜晚六點佢收工又打黎叫我出去，我話想佢番黎陪我，我喊，佢就話我煩，之後唔聽電話，最後我出咗去搵佢，我企咗喺街喊咗差不多成個鐘，不停SMS佢，佢先肯打比我，我已經好累，但我仍然陪佢玩到朝早四點幾，到星期日，我夜晚七點幾想叫佢起身同我食嘢，我不停叫佢，我話我唔想去玩，想佢用多啲時間陪我，佢就話以後邊度都唔會同我去，以後我想去邊佢亦唔會陪我，之後我好激動，不停喊，我扯開佢啲被，跟住佢用腳踢咗我幾下，我喊住問佢做咩打我，之後佢起身好大力將我個頭推埋牆，一隻手按住我，之後不停打我，用腳踢個肚，佢媽咪聽到我哋喺房嘈，之後衝入黎阻止，我之後一直躲喺佢書房，佢自己喺廳食飯，打機，睇電視，到過咗幾個鐘，我問佢會唔會同我講Sorry，頭先打我係咪一時衝動，佢竟然答我佢唔會say sorry，佢想打我好耐，之後佢仲話做番朋友算，叫我即刻走，之後我再問點解要我落咗BB，我覺得好辛苦，佢就好似癲咗一樣，好大力將我推咗埋梳化，我撞到腰同背脊，坐咗喺梳化，我話好痛，佢仲即刻衝過黎捏住我條頸，我好驚，一分鐘之後，佢放咗手仲喺度大叫，佢媽咪喺房衝咗出黎，佢仲話有刀想殺咗我，之後佢媽咪推咗我入房，叫我瞓覺，到第二日，我男朋友番咗工，我就再搵唔到佢，我執哂自己啲嘢，然後走咗，佢之後有叫佢啲朋友打比我問我點，但我打比佢，佢亦冇聽，到前兩日，我媽咪見到我手同腳都瘀哂，陪咗我去報警，我驗咗傷，亦落咗口供，警察話會搵佢調查。
之後呢兩日，我一直都好唔開心，我驚佢有事，我有想過打比佢話比佢知，但佢冇聽電話，佢知打傷咗我，但一句關心都冇，而家去到我報警，究竟我有冇做錯？
更新1:
我都唔想成日要佢陪我，但我真係心情好差，而且我身體唔好，我都好想陪佢去玩，但我實在太累，我已經好努力陪佢。佢喺Facebook寫一句對唔住，佢啲唔知咩事嘅朋友個個support佢，連知道佢打我嗰個都係咁，我真係好驚佢哋之後好憎我，好驚自己今次做錯
更新2:
其實我而家都未知警察會告佢乜嘢，如果警察真係扣留佢，我係咪真係會害咗佢呀？
更新3:
我知道有BB係大家責任，我因為想佢愛我，我先唔要BB，我覺得要對BB負責嘅係我，因為我自私。但我而家報左警，反而更加覺得唔安樂，我地曾經都有付出過，我只係想佢打黎同我傾下，我覺得自己已經冇能力再撐，再扮冇事，但佢不斷逃避我，令我覺得更加辛苦，我唔想自己每個朋友聽到呢件事只係會問我點解會識到個咁嘅人，一早就叫我同佢分開，我以為自己可以改變佢，點知而家成件事變成咁，我覺得好恐怖，好無助，佢一直唔理我，反而令我開始覺得係咪我自己做錯，我好想自己有能力同佢解決件事，我冇辦法原諒自己，我仲每晚發住一樣嘅惡夢，我已經好努力去面對，但點解個結果依然係咁
