想問BB一個月的使費要多少?

養bb既野貴有貴養，平有平養架姐

不過首先你地要決定到生左之後係邊個湊，如果你唔使番工既，咁你可以自己湊BB啦，唔使搵奶奶幫手?不過若果你唔番工，你先生果份人工夠唔夠你地一個月既開支呢?

養bb唔係由佢出世開始要用錢，係由你知道有左果一刻就已經要用錢。去政府生既話，檢查係唔使錢，一直到生b入院先計，大人$100一日，bb需要住院就$50一日，多數三四日就出得院，大約$500。雖然睇政府係平，不過事前要睇一次普通診所驗孕，而且第一次產前檢查會安排係三個月到，而且未必會照超聲波，所以你要自己去私家照，呢到加埋都要幾百至一千

去私家生既話，每次檢查收費幾百至一千，入院生b大約萬五 (或以上)

懷孕初期可以著番平時既衫，但到中後期，個肚大左咁多，除非你真係個肚好細啦，否則你都要買番幾套衫替換，又要幾百蚊。生果時都要產婦衛生巾、乳墊 (餵人奶用)、網褲、傷口清洗瓶等用品，有d用品都唔係必需既，全部都買既話大約$200-300

bb出世前就要預備好日用品，例如bb床、衣服、紗巾、沐浴用品、奶樽等。用品呢d野真係有平有貴，唔介意既話買二手用品會更平，再唔係上yahoo拍賣到睇下，都會有好多二手用品。而家當你買全新，以平均價計算，bb床 $1000，衣物 $600，沐浴+清潔用品 $200，餵食用品(奶樽+清潔劑+消毒器+奶樽刷...) $600，淨係呢d日用品都最少$2000。不過有時都未必一定要買晒全部，例如你唔懶訓既話，可以買張可以放係大人床既bb床隔，全新大約5/600，二手2/300都有。沖涼盤唔一定要買bb專用成百蚊長圓型果d，可以買普通圓型都得 2/30都有。初生bb其實可以唔需要任何沐浴露/洗髮水，直頭慳番。消毒器可以買二手，甚至用番傳統方法用個大煲黎烚奶樽，慳番幾百蚊 (但大前提係你要有記性或者要記得較鬧鐘，否則成日煲乾水又要買過晒d奶樽，咁就仲貴過你買個消毒機)。以我咁慳法，大大話話都慳到成千蚊架！

到bb出世，飲奶粉既話，初生奶粉係二百幾蚊一罐 (我個仔食美贊臣a+1 $220藥房價) 大約一星期一罐。尿片初生裝$50包，通常用到頭一兩個月，之後就會用細碼，大約$130包(經濟裝)，個幾星期一包。想慳既話可以用人奶代替奶粉，用尿布代替尿片。(大前提係餵人奶都要買材料煲湯，要買尿布仲要有時間&精神去洗有屎有尿既尿布！) 我計過我自己頭三個月，以半人奶半奶粉同用尿片既話，已經用左10罐奶粉+16包片(初生+細碼)，呢到都已經 $3240，平均千幾蚊一個月

打針既話，跟政府就免費，私家打既話，幾百蚊一支，打到一歲都要幾千蚊。萬一要睇醫生，兒科$300-$500，普通科$150-$200，要住院既政府就平d，私家就幾千至幾萬不等。講開住院，萬一bb有咩事，你都想佢有好d既"服務"，可以幫佢買份保險，一份可以保晒所有野仲有住院現金既都要大約 $350一個月

以上已經係養一個bb最基本會要用到既使費，玩具、雜物、BB車、揹帶、playgroup、六個月後食糊仔粥仔既餐具、食材都未計落去。以頭一年平均去計既話，一個月大約要$2000-3000

我覺得你而家唔好諗生出黎之後一個月要用幾多錢先，應該要諗生左出黎由邊個去湊。因為你自己唔做野，咁你先生果份，扣除你地而家既日常開支仲有淨幾多呢？若果你地兩個都做野，收入係多左，但係你就要搵人幫手湊。搵人湊既話，全日最平都要$2000 (如果住屋村有相熟鄰居可能會平d)

若果真係冇人湊，你可以搵育嬰園，滿左月就可以去架喇。全日班月費大約 $4000(未包奶粉尿片)，可以由8點睇到夜晚6點。其實如果你自己可以搵野做，當你搵到份6k既工作，以你地一家三口，月入15k，你地又係全職番工既話，可以拎到50%資助，即係交 $2000，可能仲平過搵人湊。育嬰園會幫你解決好多bb日常生活，仲會訓練到好多自理能力。不過育嬰園始終小朋友比較多，病都會多d，所以可能會比一般既小朋友睇多d醫生，尤其頭三個月。

有平有貴~

可以來這家看看, 大部份BB 仔用的野都有折. 基本上日日都是bb用品開倉日

www.babydaily.com.hk

$4000-$5000

我bb 現在6個月大，越使越多錢，頭一兩個月，每月使 1萬蚊買BB東西，之後奶粉尿片濕紙巾玩具衣服一個月 3千到啦。

9千一個月，你兩公婆都唔夠使啦。