其實納粹德軍的武器同美國比,佢地係優定劣?

想提醒樓上一樓既朋友，埃里希．哈特曼上尉既352架戰績全部由佢駕駛既Bf109式戰機得來。好少德國空軍王牌係駕駛Fw-190，諾沃特尼(Walter Nowotny)係少數既一個，佢既戰績係258架，排名全德軍第5，亦係駕駛Fw-190既第一名。但絕大多數德國空軍王牌都係駕駛Bf109，少數駕駛除上述既Fw-190，亦有駕駛Bf-110既夜間空戰王牌，如施瑙佛(Heinz-Wolfgang Schnaufer)

樓上兩位小朋友明顯中左大陸書及大陸網吹捧德軍既毒，我一向唔推介大家睇大陸既二戰史料，因為通常大陸人既二戰史水平好低，主要有兩個問題，第一係太情緒化，無客觀分析，第二係過份吹捧德軍。德軍戰績的確驚人，但其實佢地武器麻麻，產量亦不多。德軍最勁既就係於武器麻麻，產量亦不多都可以打到所有遇到既敵人一仆一碌，呢樣野先至係德軍神乎奇技既地方。

納粹德國既武器雖然算係精良，但絕非獨步天下。以空軍主戰機為例，Bf109全無向後視野，引擎推力唔算強，相比起裝有強力梅林(Merlin)引擎及氣泡式坐艙既噴火比較輸蝕。至於雙引擎既Bf-110作為日間戰機完全係廢既，作為夜間戰機的確好強，不過主要係靠飛行員既能力搭救。另外德國空軍無戰略轟炸機，戰術轟炸機長期靠落後既斯圖卡式，其實都係靠德軍飛行員戰力支撐。

至於陸軍，德軍經常比人係高度機械化既錯覺。其實大部份德軍都係徒步步兵，運送物資好多時靠騾馬，德軍正規裝甲師大約得廿幾三十個，其實機械化未必及蘇軍。德軍坦克亦唔係特別出色，1及2號坦克係廢既，3號好快過時，經常被誇張戰力既6號虎一式及7號虎王式過於笨重，機動性太低，防護亦只係一味厚裝甲，連流行既斜裝甲都無，係兩款幾唔用腦既產品。德軍坦克真正成功既係4號及5號豹式戰車，兩款坦克係當時絕對係上乘裝備，尤其係豹式更係頂尖貨式，豹式的確比絕大部份美軍戰車優良，亦可以話好過T-34，係德軍坦克真正最精彩之作。

之前有唔少高人係呢度講過，其實俾斯麥及鐵必制係照抄過時既一次大戰設計，無論戰力及防護唔算最頂尖，起碼差過大和及武藏。德軍水面艦艇真正最優秀既係良好平衡火力、機動性及防護力既袖珍戰列艦沙恩霍斯特號及格耐森瑙號，後兩者為盟軍帶來真正嚴重既損失，而且亦極度難纏，係德軍大型水面艦既代表作。

德軍潛艇技術算係上乘，不過論裝備唔及美國潛艇。美國潛艇有雷達及幫助魚雷精確射向目標既彈道計算機，德軍潛艇兩樣野都無。德軍無論陸軍及海軍，靠既都係高質素軍人既能力令較差武器都可以打敗敵人，呢樣野係其他二戰參戰國都無既。

論武器，後期美軍除坦克外樣樣野都好過德軍。美國空軍有戰略轟炸機，戰機有長程到嚇人既野馬，炮兵有208毫米炮，極聰明既近炸引信炮彈(令炮彈去到目標附近就爆炸，唔駛直接擊中目標)，航空母艦，仲有雷達及原子彈，呢啲野德軍全部唔係好原始就係根本無，所以美軍係武器上其實比德軍好。

2010-03-30 21:48:55 補充：
炮兵兄，唔好話人地個答案係垃圾，德軍戰績彪炳，佢既武器亦的確唔係廢物，被誇大或被誤解威力好大實屬正常，只係小弟覺得有必要矯正呢個常見既誤解。gn君提到德軍裝備有突擊步槍，V2導彈，噴射戰機，呢啲係人所共知既事實。不過gn君提到既觀點亦係多數誇張德軍武器威力既常見謬誤。

2010-03-30 21:53:06 補充：
無錯突擊步槍，V2導彈及噴射戰機都係革命性武器，不過其實佢地都只係技術先進，但對德軍戰局幫助不大，主因係產量太少。面對巨型美英聯軍及蘇軍係地面上既裝甲洪流及空中如蝗蟲群般既巨型空軍，德軍有幾多新奇好玩既武器都一定死。另外，德軍上述既獨門武器全部都有一個問題，就係技術太先進，先進到難以大規模生產及實用性麻麻，極其量只係新科技魔術表現。

2010-03-30 21:57:41 補充：
德軍有獨門武器，但美軍一樣有。而且美軍獨門武器有一個特點，就係呢啲武器都並非極先進既科幻玩具，相反係對時最成熟技術既最顛峰之作。野馬戰鬥機就係最好例子。野馬係活塞式螺旋槳戰機，飛行原理與當時所有流行戰機完全一樣，而且當然無Me-262飛得咁快。但野馬，係活式螺旋槳戰機既最優秀戰機，而且唔係一般優秀，而係比所有其他活塞式螺旋槳戰機好兩皮都唔只，當時天下間只有Me-262可以保證打贏佢。但野馬可以被大量生產，而Me-262玩來玩去都得得幾百架。

2010-03-30 22:02:25 補充：
其實美軍都有好多極先進既科幻式武器，只係唔似德軍既科幻武器咁被大肆宣傳。例如美軍係1944年已經有自動防空炮，支炮受當時最原始既電腦控制，完全不經人手，呢件咁既武器依家聽都覺得匪夷所思，而佢竟然出現於1944年！另外，原子彈亦係科幻武器，當時根本無人唸過區區一個炸彈威力可以大到咁厲害，而運載佢既B-29亦係近乎科幻既變態長程轟炸機，美軍有既呢兩件武器都係獨步天下。

德軍勁d!!!

陸軍:有虎式,豹式戰車,步兵裝備有k98步槍,g43半自動步槍,mp40衝鋒槍,stg44突擊步槍,88毫米高射炮,迫擊炮,魯格p08手槍,華x p38手槍,軍服又型又實用,m24木柄手榴彈,mg42極高射速輕機槍,mg34輕機槍,仲有其他先進軍備

海軍都唔錯,（1939年9月至1940年3月，共擊沉盟軍222艘商船，764766噸物資，損失18艘潛艇,盟國及中立國共損失商船2100萬噸，平均每月損失37.5萬噸，其中被德國u潛艇擊沉約1600萬噸，佔總損失噸位的76％。德國共投入潛艇1160艘,擊毀了大量敵人軍艦,對英國商船和運輸隊發起襲擊並取得了輝煌戰果

再加上海上力量2隻俾斯麥級戰艦搞到英國皇家海軍要全部總動員對付佢就知道幾強!


空軍:bf109,fw190戰鬥機戰積驚人, ju87 俯衝轟炸機 戰積驚人,仲有he111中形轟炸機,do17,do217夜間戰略轟炸機戰積都非常好,仲有最先進劃時代既me262噴射機戰積都唔錯,因為希特勒錯誤地用佢黎做轟炸機,所以戰績先無咁好

2010-03-30 21:14:53 補充：
但係德國人研製左好多非常先進既軍備啵,突擊步槍,v2火箭道彈,噴射戰機等等........

2010-03-31 14:51:54 補充：
德國me262擊落美國p51,b17都唔只幾百架啦,仲有實用性點會唔好,stg44,v2導彈戰積都好好啵,起碼可以有小小優勢同埋德國戰敗後比人搶埋d咁先進既技術再不斷改良之後可以對軍事上有好大幫助

2010-03-31 14:53:30 補充：
美國有b29哩架先進既野,德國一樣同時期可以有!

理論上德軍係優
陸軍:虎式(前方裝甲達100亳米,從未被打穿)
海軍:1160艘U潛艇,1艘航空母艦(兩艘未完成),興登堡級戰艦,俾斯麥級戰艦,沙恩霍斯特級戰鬥巡洋艦
空軍:Bf-109,Ju 87,Fw190(更創下352架的記錄)