20天歐遊 法國 +瑞士部份行程 請教

樓主suggest個行程比較奇怪，而且樓主講到明自己係backpacker，點“盡情shopping”﹖樓主有無見個有backpacker抽住一袋二袋週圍走﹖起碼小弟真係無見過。

樓主個行程最怪係點解係巴黎既時間咁少﹖其實去瑞士主要係睇自然風光，但巴黎就有大把靚絕既皇宮、古蹟及藝術品，我個人認為一定要花多啲時間係巴黎，睇晒嗰度最好既野先走，因為雖然瑞士係好靚，但其實嗰度四週圍都差不多樣，行程長啲你可能會覺得悶。

樓主個行程第二個問題係瑞士去得太多地方，Interlaken當然係必去，因為上面真係極靚，山中小鎮Wengen又係必去，我直情住係嗰度幾晚。Luzern都應該去，為左睇嗰條木橋，不過亦都剩係得條本橋及垂死獅子像(我無睇到)可以參觀下。不過，據小弟僅有關於瑞士既知識，日內瓦除左個大噴泉外(Geneva)完全無野睇，起碼我每個friend都係咁講。至於Lausanne 、 Montreux，以至首都Bern，據我所知又係無甚特別，而Basel雖然應該有啲同鐘錶有關既野睇，但應該都係睇頭不多。當然，樓主去晒上述既地方都係好既，因為瑞士邊度都咁靚，求其搵個地方剩係行下都好正，唔駛特別需要有啲咩勁野睇。但由於樓主個trip都幾趕，可以既話應該減少兩、三個城市，起碼火車都搭少幾程，慳番啲寶貴時間。

去瑞士，我永遠建議大家買Eurail Pass，因為瑞士既景點廣泛分散於全國不同城市，要去經常都要搭火車，就算錢唔係問題，剩係要經常買飛都已經煩死你，我試過一日內係瑞士搭左八程火車，無pass點得！有左個pass，你搭乜都唔駛買飛，肯定慳到可觀既時間及金錢，張pass真係勁到好似免死金牌一樣，去到邊搭車你只需要出示個pass就無其他手續搞，而且張pass仲送埋一程係Interlaken遊湖3個鐘，你仲想點﹖張pass只係唔比你免費搭某啲特別路線及坐Golden Pass時唔準佳頭等既Paranorma車箱，即係窗特別大既觀景車箱，不過唔駛恨，瑞士所有火車全無冷氣，如果你係春、夏季去瑞士，個Paranorma車箱會比陽光晒到勁熱，唔坐都唔係損失。而張pass又唔係真係好貴，買左絕對有著數。

少女峰上面我見唔到有羽絨租，不過上面又唔係真係好凍，我上去嗰日極好彩地風和日麗，雖然都係凍，但我無著羽絨。如果樓主自問怕凍，著埋羽絨都應該夠，只係佢有個景點係冰宮，嗰度就真係好凍，樓主要著多啲衫。少女峰唯一要留意既係上面有3,500米高，有啲人真係上到去適應唔到有高山反應，我好彩無，但記住千祈唔好跑，否則真係有機會休克暈低。

2010-03-17 17:55:12 補充：
哦！原來如此。以樓主講既情況，咁你去多啲瑞士既景點的確係非常正確。如果以遊瑞士為主，我會建議樓主除左去少女峰之外，亦可以去埋南部策馬特(Zermatt)上埋馬特杭峰(Matterhorn)，因為嗰度都好靚，只係樓主唔好學我咁一日去晒兩座山，應該有一晚住係Zermatt，根住用一日上Matterhorn觀景台及遊覽附近嗰個勁靚既湖，小弟因為太趕而無睇過湖，下次有機會我一定去埋。

2010-03-18 19:08:55 補充：
據小弟所知，Eurail Pass不止剩係用於瑞士，可以用於德國、奧地利等，但都係於三、四日內用晒。至於少女峰，首先小弟強調我唔係幾怕凍，所以唔著羽絨都得，但我都係建議你著羽絨，最多入面嗰件係短袖，因為上面其實幾凍，如果你係香港十幾度都覺得凍，咁你絕對要時刻都著羽絨。

2010-03-18 19:11:47 補充：
另外樓主由日內瓦入境，嗰度係法語區，如果順路，可以上埋接壤法瑞兩國邊境既白朗峰(Mont Blanc)。之後去到Interlaken及瑞士其他地方都已經係德語區。樓主唔駛擔心，瑞士人既英文好到無得頂，好多年輕人及中年人都講到一口全無口音既英文，所以溝通應該唔係問題。

雖然我自己去過以上既2個國家. 但希望可以幫到你.

有位朋友之前去過.

不過佢都識少少法文同德文(印象中是德文.)

不過都好辛苦, 試過搵唔到地方.

訓左火車站一晚. 又試過趕唔到火車.

佢曾經同我講, 好多時候係法國出發會平D.
(如果你行程冇英國點解要飛英國?)

同埋游歐洲搭夜火車等都係一個幾好既選舉.

同埋計個條數先去買PASS 因為有時真係PASS平DD, 有時唔係.

最好提早BOOK定...