BB唔舒服, 食緊西藥

你一定係初為人母喇~ 首先你唔使咁擔心先，因為你所提及既問題都係正常既

睇左醫生，最好都係依照醫生指示完成療程，特別係抗生素。你食晒抗生素之後，如果你真係唔想佢再食西藥既，你一定要知道佢好得有九成，否則d菌又再番黎適應左而家既藥，咁bb既病情就會比而家嚴重d架喇。若果你真係選擇唔食藥就直頭一次都唔食，千其唔好自己減少份量

係中醫角度去睇，西藥係比較燥熱，食左之後好易會有大便唔暢通既情況出現。所以應該要比多d水佢飲，多d水既定義係要比平時再多d，如果每次都係飲小小既話，咁你可以比番密d佢飲。盡量唔好用果汁或者葡萄糖去開水，bb有五個月，可以刮d蘋果容比佢食，一來有開胃作用，二來有通便之用。每日食一次，每次食三分之一邊蘋果都已經足夠架喇
另外你亦可以用米水開奶比bb飲，米水開奶有作清痰、清熱，bb飲得奶小既話，用米水開奶都會有營養d。米水既做法好簡單，只係好伕平時煮飯咁，但係就落多d水，一路煲到d米開花 (即係d米爛開) 咁就可以用果d水黎開奶架喇。如果唔想浪費d米既，可以係煲飯或者煲粥既時候加多d水，到d米開花既時候"不"起一d黎開奶，之後繼續煮飯/粥比大人食~

食得西藥多，胃口都真係冇咁好，所以你可以用米水開奶啦。至於小便次數同量小同黃，都係因為佢飲小左水同奶。飲番多d水就冇問題架喇。小便既地方紅左主要都係小便次數同量小左，尿液濃度增加，咁就會"淹"到小便位置紅左。解決方法除左要飲多d水之外，仲要注意清潔，慢慢就會冇事架喇

bb係病既時候係會特別扭計，所以家長們都會抱多左。bb係好聰明既，加上佢病既時候喊下就有人抱，佢習慣左，所以到差唔多好番既時候，爸爸媽媽就會覺得佢特別"痴"人同扭抱。你可以慢慢習慣番佢，放低之後唔好即刻走開，行開兩秒又番轉頭，好似玩"鳥渣"咁，慢慢將行開既時間延長。你亦可以比d玩具佢陪住佢一陣先行開

bb係6個月開始就會慢慢出牙，不過快慢有別。如果你見到牙肉邊有白色，你可以摸下，刮手既就代表佢出緊牙，否則應該只係d奶積黎姐。預備出牙既bb係會多d口水既，不過5個月既bb都有可能係因為未完全識吞嚥呢個動作所以會特別多口水。口水多唔係問題，最緊要用棉質既口水肩圍住，同要經常更換保持清潔。如果唔係口水積住係下爬位置，會令到下爬位置紅左同起紅點

如果你而家仲食緊西藥，就唔好用開奶茶喇。開奶茶既用料始終係中藥材，不宜同西藥溝埋一齊。而且開奶茶最好都係係bb開始進食固體食物後先飲用。不過若果佢係因為係疑似出牙或者放低佢就喊既問題，咁就唔需要飲開奶茶住，因為都唔關熱氣事。
不過我建議你可以係完成西藥既療程之後，bb冇咩事，可以煲比佢飲，用作清熱