about會計課程

如果讀大專或大學程度會計, 要有心理準備係同中學讀既好唔同. 中學會計比較多計數, 答文字的題目較少. 但讀大專或大學會計, 計數係有, 但你對概念是否熟悉就變得重要好多. 財務會計及管理會計比較多計數, 但其他科就會係寫字多過計數, 甚至無數計. 讀得大專程度就要預會計未必容易. 現在僱主唔會只係要求會計識計數, 最重要係有解難能力, 所以而家唔少會計專業試係以case studies形式問問題, 要你用學過的準則去答問題. 所以中學讀過會計, 起初會有點優勢, 但之後優勢會慢慢消失.
讀唔讀會計方面, 先考慮以下幾點:
1, 你自己會唔會對住好多數字就覺得好煩?
2. 自己英文有無好大問題? 因為而家會計準則係用英文寫, 英文唔好讀準則會係難事. 如果你想知自己英文程度是否適合讀會計, 你可以先去HKICPA網頁下載一份最短的會計準則去睇. 唔係要你明點做數, 但最基本要識睇大部分. 仲有, 而加僱主對學生英文仍然有一定要求.
3. 分析能力如何?
4. 你選擇得讀會計, 我當你打算畢業後會找相關工作. 所以讀之前一定要做好research, 睇你唔同學歷程度可以做乜工, 人工係點, 晉升機會如何, 將來想進修可以點. 做Research一定要認真做, 多看其他方面資料, 預測一下未來香港會計市場如何. 因為好多人對會計有唔少誤解, 或者唔知讀乜就去讀會計, 畢業後做野就不斷埋怨份工唔好. 會計唔係每份工都係過萬月薪, 亦未必係一份穩定工作. 考牌日子係最辛苦, 因為工作時間已經好長, 無乜時間讀書. 就算考到牌都要不斷update自己, 因為世界已經不停在變. 所以亦要問自己, 你可唔可捱苦? 好彩既可以遲幾小時放工, 但大會計師樓會有可能2-3am放工.
5. 你唔選擇日校, 我當你打算全日要返工. 全日返工夜晚讀書係好辛苦, 能夠唔半途而廢兼且成績好係一件唔容易的事. 你會唔會話因為返工好辛苦就唔去讀書?
6. 你對會計無認識, 我建議你多D睇下教會計D書, 睇下自己係唔係讀會計材料. 咁樣總好過你讀讀下發現自己無興趣, 浪費自己時間及金錢.
無學過會計就要由開頭讀起. 如果你唔讀日校, 你可以讀夜間文憑或高級文憑. IVE有夜間兼讀會計高級文憑, 會考5科合格要讀4.5年. 商專有夜間會計文憑.