陳奕迅 <<一絲不掛>>的歌詞係咩意思???

講分手。（其實係講束縛）

分手原因係個女o既覺得冇自由, 被束縛, 但其實真正被束縛o既係個男仔： 「這根線其實說到底　誰拿捏在手」－－當然係個女仔。男仔分手後無論做乜都係為左個女, 因為見個女仔分手後仍然「鬆綁了又願見面」, 想有機會復合。

「那時青絲　不會用上餘生來量度」, 青絲解頭髮, 呢句係誇張咁話頭髮會變白, 唔因為時間流逝卻因為個女仔。

之後個女仔有男朋友, 個男仔放棄, 要「頑強病好」, 唔再諗個女仔。為左個女仔開心。

但係最終個男仔都做唔到, 「發現沿途尋找的快樂」都「仍繫於你肩膊」而又「不甘心去捨割」, 感歎「難道愛本身可愛在於束縛」；

而呢句亦都係全首歌o既主旨：愛情會令雙方互相束縛, 而且束縛會以不同形式出現。

「無奈你我牽過手　沒繩索」更令整首歌詞帶有餘韻, 雙方有緣無份, 因束縛而分開, 但同時亦都因為雙方手中「沒繩索」, 即使親密過, 都只係借來的光景。沒有繩索能再將雙方拉番埋一齊, 所有都完結了, 只係束縛一直都有。

我諗, 歌名《一絲不掛》唔係指冇著衫果隻, 絲應該係絲線, 比喻束縛。