邊度有高價收新LV呢?

其實要睇你去歐洲邊度，最common既係英國or法國．通常人都買LV同Gucci，每個款唔同，但大概計埋退稅，等如香港專門店既價錢八／八五折．

我唔知道你去邊度放可以賺多d．但可以肯定米蘭站果d一定唔得，因為佢全新袋都無可能八折幫你收，另外：
1) 你想賺，人地舖頭都要賺．一個袋香港賣8000為例，水貨舖通常九／九五折賣出街，即係得一折HKD 800你地兩個分，咁你話喇，如果間舖頭會唔會一個袋只係賺三五百？換句話說，我都唔知佢會肯幾錢幫你收，你又究竟可以賺到幾錢

2) 除非你可以去法國買到Hermers袋，咁就完全唔同！Hermes唔係有錢就買到，去到法國專門店，仲要睇下d sales肯唔肯賣比你．我之前去，佢同我講"we dont hv Birkin"，但我見到佢拎幾個幾十萬既鱷魚皮Birkin比d內地人揀囉！所以如果你買到Birkin，咁拎返香港就有市！如果你咁好彩買到好hit既色，或者好特別既款，咁你就唔使擔心返香港放唔到

3) 另外，除左Hermers，如果其他牌子（e.g. LV, Chanel, Gucci）你買到d特別版or限量版，返香港都應該唔難放既．但如果普通人／門外漢，就真係未必買到呢d喇

4) 呢d牌子既手袋閑閑地都一萬幾千一個，如果你買幾個已經幾萬喇，最好考慮下自己既流動資金，如果放唔到好價錢的情況下，可唔可以應付到

5) 再者，近排果邊都好凍，我諗你本身已經要帶唔少野．如果你去歐洲唔短時間，行李就更加多，所以買之前最好諗諗位置既問題

6) 多口講句，果邊咩都貴，就連食野都貴．細細杯熱粟米要3英磅，Fish & Chips要6英磅，響法國一個熱狗要7.5歐羅，兩個人食麥當當都食左HKD 120！
同埋佢地唔興食熱野，早午餐都係sandwich同wrap，睇你接唔接受到冰天雪地仲要食三文治同沙律．如果你想幫補旅費，倒不如帶個小水煲（好似暖水杯咁大，去旅行用，只夠煮一個麵的份量），煮個蝦子麵食，又暖又慳錢！

7) 如果你真係想買袋黎賺錢，倒不如問下身邊親戚朋友有無人想買，咁樣的話佢可以平少少買之餘，你又可以賺d錢．但要記得買既時候分開單，一個袋一張單，易d計數．
如果LV既，你可以去LV網頁，揀英國／法國（視乎你到時回響邊度買），catalogue有齊咁多款既model code，尺寸同英磅／歐羅既價錢，可以同香港專門店比較下．

8) 有人話去LV唔可以買幾個手袋，因為唔鼓勵走水貨，d sales會唔賣比你．但我就未遇過，你諗吓啦

9) 提提你：如果去大百貨公司買，可以當場搞埋退稅，但會扣手續費．所以唔好以為當地15% VAT你就可以真係可以攞返15%，應該大約得返10-12%

希望幫到你啦～
玩得開心d！