騎兵的用處

話騎兵用來衝破步兵陣只可以話啱一半，因為騎兵唔可以唔理三七二十一就向敵人步兵衝鋒。係重機槍(即係常講既機關槍)發明之前既年代，全世界既陸軍部隊打仗大致上以如下方式佈陣﹕整條戰線正中心以重步兵組成並面向敵人，呢條重步兵戰線係整個戰陣既核心，班重步兵唯一既任務係維持呢條戰線既完整，絕不能被敵人衝破。係冷兵器時代既重步兵真係著極重裝甲，件裝甲重到幾乎郁唔到，所以機動性好低，但唔緊要，因為重步兵真係預左唔郁既。去到火槍時代，重步兵唔再著重甲，所謂既重步兵大致既意思係指排槍兵，佢地係受到極高度訓練既步兵，分成三排，可以練到一排射完到另一排，如果做得好，殺傷力可以極大。

騎兵既職責就係要衝破上述既重步兵陣，無論有無火槍時代都係要咁做。一般黎講，騎兵係一國陸軍之精銳，非到最關鍵一刻都唔出動。由於騎兵最精銳，所以當然唔會一開始就硬碰硬向敵人組織良好既重步兵衝鋒。係冷兵器時代，攻擊方會用弓箭、投石車、輕步兵及輕騎兵(最後衝鋒既一定係重騎兵)先騷擾敵人，係火槍時代就用大炮騷擾敵人(攻方步兵唔會向敵人前進時用排槍射擊，因為排槍射程短、準繩差，而且發射後煙多，根本無可能成功，排槍只可以係防守時用)。如果敵人既戰陣被騷擾後有失去秩序既可能，攻方主將就可能會使用重騎兵嘗試向敵人衝鋒。

重騎兵衝鋒時幾乎係不可抵擋既，守方要等到敵軍騎兵衝到己方陣前時先至可以有機會擋住。冷兵器時代擋騎兵比較有效既方法係手持長矛及盾牌之重步兵，例如名揚天下既瑞士重步兵就係出名在訓練有素既長矛兵。或當時既核武器，即係長弓兵，有長弓兵可以係五、六百米射殺一個重甲騎兵。係火槍年代，殺重騎兵主要靠排槍兵，輔以輕步兵(係用較短既卡賓槍或手槍)。

雙方交戰，關鍵就在於攻方騎兵衝鋒是否成功。若攻方騎兵衝鋒成功，守方將被包圍，呢樣野對守方係極度災難性。因為守方重步兵已被敵人騎兵衝到後方，即使守方重步兵無被衝散並仍然保持良好組織，但由於重步兵機動性差，佢地幾乎無法轉身對付敵人靈活既重騎兵。但最重要既係，守方重步兵戰線係用黎硬食攻方既所有攻擊，條戰線後面就係全軍最重要但又最脆弱既部隊，如糧秣隊、守方司令部、炮兵部隊等，攻方騎兵係衝破守方重步兵後就可以肆意攻擊上述最重要但又最脆弱既部隊。再加上攻方步兵會攻上黎幫手，所以如果守方重步兵被衝散，可以話幾乎一定崩潰戰敗。

但又唔一定咁講，即使守方被攻方騎兵衝入戰陣，但若果守方係訓練極佳，尤其係火槍時代有極高訓練既排槍兵或冷兵器時代既長槍兵，咁攻方重騎兵既衝力將會極快地被削弱，而且由於攻方重騎兵無法令守方戰線崩潰，佢地將會被守方訓練有素既部隊包括及分割，係呢個情況下，攻方重騎兵好大機會全軍覆沒，最少都傷亡慘重。如果係咁，攻方就大難臨頭，因為重騎兵係精英中之精英，如果傷亡慘重，就好有可能被守方既重騎兵反衝鋒，到時被滅既將會係原先既攻方。所以係以前打仗，幾時先用重騎兵衝鋒係極之重要既事情，而騎兵將領永遠都係最資深既將領，好多時最高統帥會親率重騎兵，或永遠親自決定重騎兵衝鋒既時機。亞歷山大就係其中一個例子，佢身邊既皇家衛隊係馬其頓最精銳既騎兵，大帝係阿貝拉會戰就親率皇家衛隊向已被衝散既波斯戰線衝鋒，最終大獲全勝。而拿破崙則將所有法軍騎兵交比繆拉元帥(Marshal Joachim Murat)帶領，因為繆拉不僅係拿破崙妹夫，亦係當時歐洲公認最優秀既騎兵將領。滑鐵盧一戰，繆拉已投敵幫助聯軍，呢個係拿破崙輸左呢場戰爭既其中一個原因。

至於樓主問一戰英軍能否抵抗蒙古騎兵，個答案則係唸都唔駛唸咁簡單。騎兵根本就係於一戰後衰亡，原因係一戰中各國(包括英軍)都大量使用重機槍，但各國最精銳騎兵竟然仍向敵軍陣線作全面衝鋒，包括英軍重騎兵在內，而且仲要唔係一次！結果如大家所料，所以騎兵幾乎全軍覆沒。就係因為係一戰中騎兵衝鋒已完全無可能，所以一戰其間各國基本上都無法再突破敵軍戰線，直至坦克出現先至改變整個局面。

2010-02-20 01:46:04 補充：
咁講就有啲意思。雖然話英軍有槍，但正如我係正文所講，排槍兵要訓練極佳先至有機會打敗攻方騎兵。另外，係無重機槍既年代，英軍都唔係未試過係有大炮及訓練有素既步兵下被裝備差好多既敵人打敗。蒙古騎兵其實同其他較落後民族既騎兵差不多，都係無用槍械既騎兵(騎兵無論輕重，係火槍年代已經使用槍械，重騎兵會用卡賓槍，亦會保留軍刀，輕騎兵多數用手槍)。

2010-02-20 01:53:55 補充：
如果用冷兵器既攻方騎兵數量較多，再加上訓練優良，要打贏數量較少但裝備較優良既敵人絕對有可能。唔駛做蒙古打英軍既思考實驗，係2001年既阿富汗戰爭，反塔利班既北方聯盟既主力仍然係騎兵(雖然北方聯盟既騎兵係用槍，但佢地真係現代碩果僅存騎馬既騎兵！)。但當時塔利班有坦克，有堅強據點，亦有重型步兵武器，如機關槍、火箭炮等，但據報導北方聯盟既騎兵仍會向塔利班既據點作無畏既正面衝鋒，而且仲可以贏！

2010-02-20 02:01:52 補充：
當然呢個case係極特殊既例子，首先仲有騎兵已經夠特別，另外塔利班既士氣亦實在低到無人有，竟然怕血肉之驅既騎兵！不過呢單野証明如果面對數量不佔優勢但裝備較優既敵人，訓練有素及士氣高昂既騎兵係可以擊敗對方。但呢樣野係現代戰爭已成絕響，只剩下如北方聯盟對塔利班既極特殊個案。因為現代戰爭雙方就算係數量上太懸殊，裝備及士氣亦好少差到連抵抗血肉之驅既正面衝鋒都做唔到。再加上現代陸軍已不可能再使用騎兵增加機動性，依家所謂既“騎兵”係指全面機動化既重裝甲師。

但有一點你要留意, 在美英聯軍一直唔願意配合北方聯盟(北方聯盟也曾經是殘暴政權), 結果兩邊都打唔入塔利班, 美英登陸唔到, 北方聯盟繼續被塔利班掃蕩.
當然, 後快美英正義之師就向現實屈服, 配合北方聯盟後, 就已經完全不同的景況. 轟炸機濫炸之後, 莫說用原始騎兵, 幾十人騎毛驢也可以衝破敵陣

SORRY 呀樓主同 Steven 兄，小弟多嘴！小弟程度唔夠！完全睇唔明樓上嗰位時空錯亂嘅老友想講乜！
講布倫牛角機、Lee Enfield Mk-2 就算唔係都近一戰少少吖！
GPMG、L1A1(FN-SLR)、Lee Enfield SA-80 全部部唔係七十後嘅嘢！到底要話比大家知佢有心答錯題定係唔識？？？

英國佬早年已經有支GPMG坐地重機, 同步槍- 早年的SLR; 到後來的SA80..於港為求劃清界線, GPMG係老防- 防衛軍的震山之寶, 而英軍就一向有用LMG, 都係連發, 坐地重機一種. 而現代騎兵的用途, 在於打暴動, 驅散人群及國體巡遊之用.