叻架vs光油vs磁漆

PYLOX透明手噴漆我未用過，不過根據常理，噴得出嚟既都唔會係磁漆或光油，因為呢兩種油起碼半個鐘頭先至會表面乾，仲要係入面未乾嗰隻，就好似包住糖漿既朱古力咁，大力D都可以卒甩佢。如果你噴既係磁漆或光油，由於慢乾既緣故，D油會飛出嚟黐住哂你屋企d嘢，黐到周圍都係，抺都抺到你傻！而且仲會黐住你塊面，你喊都冇用。

十八年前，我見過幾個傻瓜用磁漆噴網球場嗰D鐵絲網，結果半塊面都係磁漆，頭髮反而冇，因為佢哋用毛巾包住個頭同埋口鼻！而所謂十八年前中既「十八」兩個字，只係概念形容詞，唔係量詞，即係好耐以前咁解。就好似「三人行必有我師焉」句中既「三人」，意思唔係三個人而係幾個人。又例如「萬事如意」句中既萬字唔係指一萬既準確數目量詞，而係表示極大量既形容詞。

又係十八年前，有個客佢樓上漏水，我上去樓上按門鐘，對方一開門我就聞到好大陣書香味，係古書嗰種香味，原來成屋都係書！應門嗰位七十幾歲既書蟲阿伯同我講唔夠兩句，就指住佢門口寫住萬事如意既揮春同我講，話揮春咁寫係錯既，佢話如果多過一萬件事咁點？應該寫事事如意至啱。我同佢白痴鬥白痴，我話有一萬件事如意己經好好啦，唔好要求咁多嘞。佢即時啞口無言。
千祈唔好鑽牛角尖。
對唔住，我口水太多，而家言歸正傳。
手掃漆英文係brushing lacquer，
力架英文係lacquer，當中qu兩個字比較特別，唔發kw音，只發k音。
對唔住，我口水太多。
磁漆英文係enamel，
光油英文係varnish，n世紀以前己經有人將呢隻油音譯做凡立水，呢個係有誤導性既譯法，因為佢根本唔係水劑water-based而係油劑oil-based。
對唔住，我口水太多。
單憑英文己經知道四者互不相同。
磁漆、光油的溶劑是松節水，手掃漆、力架的溶劑是天拿水，用松節水完全不能溶解力架或手掃漆。
雖然天拿水亦可混和溶解磁漆、光油，但除非事急馬行田，否則一般正路既裝修師傅絕少用天拿水開稀磁漆、光油，因為有不良後果。
乾透後，磁漆、光油漆膜韌性相對較高，力架次之，手掃漆漆膜相對較脆。
手掃漆、力架較磁漆、光油快乾得多，如果喺幾呎高噴出嚟，微粒飄到落地己經表面乾，唔會黐住地下。
磁漆、光油漆膜較粗糙，手掃漆、力架就算唔抛光，漆膜亦較細緻幼滑。
手掃漆、力架乾透後可用天拿水還原，磁漆、光油乾透後化學分子結構可能己改變成為另一種物質，不能還原。
由於手掃漆、力架可還原，故此可用綿花光布沾天拿水或稀漆拋光，磁漆、光油不行。
上述四種漆油勉強只可以分作兩大類別，最多係咁。

2010-02-18 22:38:09 補充：
噴磁漆會黐住塊面並唔係因為佢太黐，而係因為佢太慢乾，噴出嚟既微粒飛到邊就黐到邊，因為佢未乾。

2010-02-18 23:01:47 補充：
仲有，磁漆、光油好容易塞住噴咀，因為微粒粗而且乾咗溶唔返，罐油用一次就要丟，所以你果罐噴漆應該唔會係磁漆、光油。

光油係叻架，亦係冇顏色嘅磁漆。