✔ 最佳答案
樓主有留意小弟之留意，我當然知無不言。坦白講，小弟去旅行既地方唔算多，只係由於有太多地方實在係危險到名聞天下，但竟然仲有人敢話去，小弟唔希望有人樂極生悲，所以如果知道乜野，那怕只係耳濡目染既小道消息，小弟都希望先與各位想闖地獄既朋友分享左先，至於各位是否雖千萬人，吾往矣，則自然不在小弟既責任之內。
樓主問有邊啲地方係九反之地，咁多，點講﹖由於無法盡錄，所以小弟只講幾個應盡量避免既區域，係嗰啲區域內既國家，真係連搭飛機經過都盡量唔好。第一號危險區域自然係撒哈拉以南既黑非洲。樓主提到既尼日利亞、兩個剛果等都屬於呢個個區域，範圍大致上由撒哈拉南境至南非既廣大區域。黑非洲地區既國家大部份都極端貧窮，長年內亂戰亂不息，疾病橫行，當中出名危險既國家有尼日利亞、兩個剛果、蘇丹(Sudan，尤其係戰亂不斷既達爾富爾(Darfur)地區)、乍德(Chad)、安哥拉(Angola)、莫桑比克(Moçambique)、中非、津巴布韋(Zimbabwe)等已完全或幾近徹底失效既國家。係呢啲地方，人命完全唔值錢，無論任何人時刻都極度危險，呢啲地方自然唔可以去。
其實南非都唔好得好多，雖然該國係近年香港人旅遊較熱門既地方，但南非自從廢除種族隔離政策後經濟完全未好過，治安極差，最大城市約翰奈斯堡(Johannesburg)雖然與首都比勒陀尼亞(Pretoria)係雙子城，但約市無因為鄰近首都而好多少，嗰度既持械行劫罪案非常嚴重，經常發生開槍傷人致死既案件，基本上嗰度絕不能自由行，跟團都可以有危險。仲有，撒哈拉以南非洲近20年係愛滋病橫行最嚴重既地區，稍一不慎，隨時惹到世紀絕症。
除左黑非洲，中東既伊拉克及中亞既阿富汗因戰亂而生靈塗炭，唔駛解釋都應該知唔好去。歐洲既俄羅斯雖然係比較先進既國家，但即使係佢最大既兩個城市，莫斯科及聖彼得堡，兩市既治安都唔好，遊客被劫或被警察敲詐亦時有所聞，嗰度最多只能夠跟團去，自由行絕對唔推介。
另外，巴西聖保羅市(San Paulo)亦係出名治安極差既城市，同約翰奈斯堡差不多，持械行劫案相當嚴重，可免則免。近來發生地震既海地(Haiti)亦係出名既失效國家，即使無天災，整個海地本身都已經係世界上最貧窮，發展最差既國家。佢既首都太子港係平時都已經係罪案率極高，居住環境極劣，本身已經係店都店得既地方，依家仲要經過咁嚴重既地震，相信未來既情況只會更差，真係千祈唔好去。
2010-02-14 18:48:35 補充：
小弟未去過東歐，不過據聞東歐國家治安麻麻。雖然嗰度未至於會有牽涉人身安全既嚴重罪案發生，但旅遊失竊既個案時有所聞，不過只要小心啲，相信問題不大。
