✔ 最佳答案
雖然而家好多外國品牌既電動工具都喺大陸設廠,不過亦真係有唔少真正既冒牌貨根本都唔係果間廠做。我見過有D品牌電動工具既電源線好假,線身好幼而且好硬,唔得軟熟,屈曲過既位置起哂節,即係條電源線好似電子線路圖中既電阻符號咁,一揸上手就覺得有D唔妥。你可以比較下你支電鑽既電源線同其他賣電鑽鋪頭同一model同一產地既電鑽電源線有冇唔同,冒牌貨往往連電源線都用埋哂D cheap嘢。如果你肯定買咗支冒牌貨可以搵海關投訴。
你都好坦白,話自己食飽飯冇事做揸住支電鑽喺屋企對住幅牆亂咁鑽,你可唔可以坦白D話埋俾我聽你到底有冇俾阿媽鬧?如果你阿媽冇鬧你,我相信你間屋一定係租返嚟。
想補返D 吼最經濟既方法就係走去五金鋪買兩蚊白英坭,溝少少水搓到雪米糍咁,然後用漆摌捫入去,五分鐘之後用抺手紙抺咗個吼周圍果D多餘既白英坭,再等二十分鐘之後用抺手紙或紋理唔太粗既布包住一舊大約直徑兩三吋左右底部扁平既物體,喺個吼上面輕輕打圈磨咗突出嚟果D白英坭,布或抺手紙某位置揩滿白英坭就轉用另一位置,重複咁做當係省沙紙,白英坭凝固咗之後仲硬過黑英坭,所以一定要趁佢未凝固之前磨平突出嚟既地方,而佢起碼要幾個鐘頭先至真正開始慢慢變硬。
如果你想講究D,可以用吸塵機吸哂吼入面D塵,再用噴水壺唧D水入個吼度,唔使唧太多,吼邊充分濕潤就得,咁樣白英坭會同個吼咬得實D。
有一吋直徑既吼,白英坭乾咗之後好大機會裂開,所以要儘量「傑」D。
除咗白英坭,亦可以喺五金鋪買兩蚊石膏粉加D開稀咗水既白膠漿搓勻捫入個吼度,乾咗之後用150 號紅沙輕輕手省平個吼。
如果你個吼打算補返乳膠漆,我就唔建議你用玻璃膠,因為玻璃膠會「贊」開乳膠漆,用白色塡縫膠好過玻璃膠。