我想知道佢對我係點?

大約兩個月前識左個男仔, 三十幾歲，差唔多大我十年，佢約過我出黎食飯出街，每次約會後都會提議下次幾時去邊玩，出左第二、三次街之後我有sms表示過對佢有好感，但佢回覆只係想同我做朋友之類既意思。我覆返佢可能我同男朋友關係唔好先會咁，同佢講左對唔住。第二日佢約左我出黎食飯，送左本笑話書比我，食飯完全冇提過昨晚既事，又照約我下次出街。如是者到現時為止我地每一至兩個星期會見一次，出親街佢都要比晒所有食飯、睇戲錢，同我去認為我會鍾意既地方，食飯、睇戲果陣都會好照顧我，間中扶下我，睇戲果陣又間中望下我，問我凍唔凍︳又用佢件衫幫我冚住個身。

佢平時唔會打電話比我，我地又交換左msn，但每次都係我同佢講野先，問下佢近況等，我開左個頭佢就會好樂意同我傾，話唔阻佢做野佢都會話唔緊要，跟住又繼續同我講好多野，又會話約下我去玩咁，這談間有讚過我後生又有魅力，想要多d選擇一定有，我都有問過佢好似冇女友/老婆咁(因為佢好似個個星期六日都約我)，佢話曾經有過，但過去左，而家只係專注工作，跟住我就冇再問。

上星期六我見大家差唔多時間放工，臨收工果陣約佢tea，諗住tea完佢就去行街，我就去温書，tea完後佢問我使唔使陪我，我話會悶死你架喎，佢就話”我唔會阻阻你架bor，我自已睇下書”，於是陪左我去，取消左佢原本話行街既計劃。搭地鐵果陣太迫人，佢貼住我，搭住左我膊頭，同我講話太迫人，冇法唔搭住。

我想知道佢對我係點? 有冇好感? 如果我表白多次有冇機會?