大家覺得我做得啱唔啱？

篇幅較長，請見諒！！！( 希望大家可以幫幫我~ )
件事係我公司有個男同事鐘意我，之前我唔知情。有一次我放假，夜晚去完街就順路返左公司睇下個禮拜張更表，點知佢見我下個禮拜二放假，想約我禮拜二去睇戲，我都feel到佢想追我，因為佢原本禮拜三先放假，佢特登同其他同事調假，當時佢約我嗰刻我有D開心，因為我未拍過拖。但係我今日早上已經打左電話拒絕左佢，我話我今日唔會同你去睇戲，仲話自己已經諗左成晚，諗得好清楚，我仲同佢講:[我覺得我地都係做返同事比較好]，點知佢仲係咁問，問我明明應承佢去睇戲，問我點解變得咁快，仲不斷話會照舊喺我樓下等我，等到我出現為止，我叫左佢唔好嚟，跟住佢竟然話就算唔去睇戲都可以出嚟一齊食野，我即刻話唔舒服要休息，又話自己心中已經有另一個人，其實我咁講都只係唔想佢再煩住我。但係佢真係好煩，叫我落樓俾佢見一見，我唔肯，但係我明天返工又見到佢，我好怕佢又煩住我，我應該點做？
既然我已經拒絕左人，如果仲應承佢出嚟食野，等於俾左一個希望佢，只會令佢對我死纏不休。當時之所以應承佢，只係因為我開心有人追，諗返轉頭，我唔係鐘意佢，更加冇愛過佢。雖然佢都幾好人，身邊D同事朋友都話佢幾好，但係唔鐘意就係唔鐘意，冇可能就係冇可能，冇可能佢好人同埋D同事話佢好我就要接受佢。我覺得咩都可以攞嚟講笑，但係感情事一定唔可以攞嚟講笑。
我覺得既然對人冇意思，唔鐘意人，就應該盡早同人講清楚，唔應該拖拖拉拉，如果唔係到最後只會傷害到人，又傷害到自己，而且我同佢根本冇開始過，但係我真係冇心傷害任何人。而且我發覺，原來拒絕人嗰刻，都需要好大勇氣......
我真係好想知我咁做有冇錯，件事困擾左我成晚，希望有心人可以解笞，萬分感激！！！